15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
ԱՄՆ-ն հայտնել է, որ Սիրիայում ռուսական Սու-35-ը որսացել է ամերիկյան ինքնաթիռը
Քաղաքականություն
18.07.2023 | 15:40
ԱՄՆ-ը քննադատել է Սիրիայում ռուսական Սու-35 կործանիչի կողմից ամերիկյան հետախուզական ինքնաթիռի վտանգավոր որսումը։ Ռուս օդաչուի գործողութունները վտանգել են ամերիկյան ինքնաթիռի անձնակազմի չորս անդամների կյանքը, հայտնում է AP-ն՝ վկայակոչելով ԱՄՆ պաշտոնյաներին, որոնք խնդրել են չհրապարակել իրենց անունները, փոխանցում է DW-ի ռուսական ծառայությունը։
Լրատվամիջոցի զրուցակիցների խոսքով՝ հուլիսի 16-ին ռուսական Սու-35 կործանիչը շատ մոտ է թռել ամերիկյան MS-12 հետախուզական ինքնաթիռին, ինչը թույլ չի տվել ամերիկյան անձնակազմին օդանավն անվտանգ կառավարել։ Նրանք միջադեպն անվանել են «անապահով վարքագծի նոր մակարդակ, որը կարող է հանգեցնել դժբախտ պատահարի կամ մահվան»:
Թե որքան մոտ է թռել ռուսական կործանիչը, պաշտոնյաները չեն հստակեցրել։
Սիրիայում Կողմերի հաշտեցման ռուսական կենտրոնի ղեկավարի տեղակալ Օլեգ Գուրինովն իր հերթին հայտնել է, որ ԱՄՆ-ի գլխավորած կոալիցիայի ինքնաթիռները, այդ թվում՝ MS-12W-ն, երեք անգամ խախտել են Սիրիայի օդային տարածքը։
Վերջին շաբաթների ընթացքում ռուսական կործանիչները մեկ անգամ չէ, որ հետապնդում են ամերիկյան MQ-9 Reapers անօդաչուներին, սակայն վերջին միջադեպը տագնապ է առաջացրել, քանի որ վտանգել է ամերիկացիների կյանքը: Պենտագոնի բարձրաստիճան պաշտոնյան հայտնել է, որ ԱՄՆ-ն դիտարկում է մի քանի տարբերակ՝ հակազդելու Ռուսաստանի աճող ակտիվությանը Սիրիայի երկնքում, սակայն չի նշել, թե ինչ միջոցառումների մասին է խոսքը։
Հավելենք, որ Սիրիայի երկնքում ռուսական կործանիչները հուլիսի 5-ին վտանգավոր հեռավորությամբ անցել էին ամերիկյան ԱԹՍ-ների կողքով, ինչի հետևանքով դրանք շեղվել էին երթուղուց։
Էմմա Չոբանյան
