Քաղաքականություն
17.07.2023 | 15:13
Թուրքիայի նախագահ Ռեջեփ Թայիփ Էրդողանը Պարսից ծոցի երկրներ այցից առաջ հրավիրված ասուլիսում անդրադարձել է նաև ՌԴ-ի կողմից հացահատիկային գործարքը չերկարաձգելուն։
«Այս նախաձեռնությունն արդեն պատմության մեջ է մտել որպես դիվանագիտական կարևոր հաջողություն։ Նախաձեռնության շնորհիվ համաշխարհային շուկա է առաքվել ավելի քան 33 մլն տոննա հացահատիկային արտադրանք»,- ասել է Էրդողանը, փոխանցում է TRT Haber-ը։
Նա նշել է, որ Անկարան ակտիվացրել է դիվանագիտական ջանքերը դրա երկարձգման համար։
«Չնայած այսօր արված հայտարարությանը՝ ես կարծում եմ, որ իմ ընկեր Պուտինը ցանկանում է, որ մարդասիրական այս կամուրջը շարունակվի»,- ասել է Թուրքիայի նախագահը։
Ըստ նրա՝ Թուրքիայի և ՌԴ-ի ԱԳ նախարարները հեռախոսային բանակցություններ են վարելու այդ հարցով։ Էրդողանը նաև հայտնել է Պուտինի հետ այս հարցը քննարկելու մտադրության մասին։
«Երբ մենք հանդիպենք օգոստոսին, հնարավորություն կունենանք քննարկել այդ հարցերը»,- ասել է նա։
Հավելենք, որ թուրքական կողմի հաղորդմամբ՝ Պուտինը պատրաստվում է օգոստոսին այցելել Թուրքիա։
Նշենք, որ ՌԴ ԱԳՆ-ն պաշտոնական ծանուցմամբ տեղեկացրել է Թուրքիային, Ուկրաինային և ՄԱԿ-ին հացահատիկային գործարքը երկարաձգելու առարկության մասին։ Սևծովյան հացահատիկային գործարքը կնքվել է 2022 թվականի հուլիսի 22-ին ՄԱԿ-ի, Թուրքիայի, ՌԴ-ի և Ուկրաինայի միջև՝ Սև ծովի Ուկրաինայի նավահանգիստներով ուկրաինական հացահատիկի անվտանգ արտահանման համար։ Գործարքն արդեն մի քանի անգամ երկարաձգվել է։ Վերջին անգամ երկարաթգված գործարքի ժամկետը լրանում էր հուլիսի 17-ին։
Էմմա Չոբանյան
