Քաղաքականություն
17.07.2023 | 15:57
Ադրբեջանի նախագահ Իլհամ Ալիևը կարգադրություն է ստորագրել ուղղված Էներգետիկայի նախարարությանը՝ Ուկրաինային մարդասիրական օգնություն ցուցաբերելու համար միջոցներ հատկացնելու մասին։ Այս մասին այսօր տեղեկություն է տարածել Ադրբեջանի ղեկավարի մամուլի ծառայությունը, հաղորդում է Eadaily-ն։
Փաստաթղթում ասվում է, որ «հումանիզմի սկզբունքների հիման վրա» Ադրբեջանը բազմաթիվ երկրների հումանիտար օգնություն է տրամադրում երկկողմ և բազմակողմ հիմունքներով։
Ըստ կարգադրության՝ մարդասիրական օգնություն ցուցաբերելու նպատակով Ադրբեջանի 2023 թվականի պետական բյուջեով նախատեսված երկրի նախագահի պահուստային ֆոնդից Էներգետիկայի նախարարությանը հատկացվել է 7,6 մլն դոլար՝ էլեկտրասարքավորումների ձեռքբերման և առաքման համար։
Ադրբեջանի Ֆինանսների նախարարությանն էլ հանձնարարվել է ֆինանսավորում տրամադրել նախագահի հրամանագրում նշված չափով, իսկ երկրի նախարարների կաբինետին հանձնարարվել է լուծել այս որոշումից բխող հարցերը։
Ռուսական ԶԼՄ-ները նշում են, որ Կիևի իշխանություններին մարդասիրական ևս մեկ օգնություն հատկացնելու վերաբերյալ Ալիևի հրամանի մասին հայտնի է դարձել Ղրիմի կամրջի վրա պայթյունի օրը։
Տաթև Ֆռանգյան
