Քաղաքականություն
14.07.2023 | 13:31
Ադրբեջանի արտգործնախարար Ջեյհուն Բայրամովն ընդունել է Կարմիր խաչի միջազգային կոմիտեի (ԿԽՄԿ) Բաքվի գրասենյակի ղեկավար Դրագանա Կոզիչին։ Ադրբեջանի ԱԳՆ-ն հայտնում է որ հանդիպման ընթացքում քննարկվել են Ադրբեջանի և Կարմիր խաչի համագործակցության հարցեր, Լաչինի միջանցքում ապօրինի տեղադրված անցակետի շուրջ իրավիճակը, ինչպես նաև Արցախի Կարմիր խաչի գործունեությանն առնչվող հարցեր։
Բայրամովը հայտարարել է ԿԽՄԿ-ի միջոցով բժշկական նպատակներով սահմանային անցակետով Արցախի հայերի անցումը «բոլոր անհրաժեշտ կանոնների պահպանմամբ շարունակելու մասին»։
Բացի այդ, Բայրամովը կրկնել է ավելի վաղ արված հայտարարությունները, թե Արցախի հայությանը կենսապահովման անհրաժեշտ ապրանքների ապահովման համար հնարավորություն է օգտագործել Աղդամ-Ստեփանակերտ ճանապարհը։
Նշենք, որ այս նույն թեզերը Բայրամովը կրկնել էր նաև հունիսի 24-ին Դրագանա Կոզիչի հետ տեղի ունեցած հանդիպմանը։
Հավելենք, որ պաշտոնական Բաքուն, Հայաստանից զատ, շարունակում է նաև միջազգային այս կազմակերպության դեմ արշավը, որի հիմնական նպատակը ԿԽՄԿ Արցախի գրասենյակը Բաքվի գրասենյակի ենթակայությանը փոխանցելն է։
Էմմա Չոբանյան
