25.07.2026 | 10:33
Արտարժույթների փոխարժեքները՝ հուլիսի 25-ի դրությամբ
Ուկրաինան արդեն ստացել է կասետային զինամթերք ԱՄՆ-ից, բայց դեռ չի օգտագործել դրանք. ուկրաինացի գեներալ
Քաղաքականություն
13.07.2023 | 19:23
Ուկրաինական «Տավրիա» զորախմբի հրամանատար Ալեքսանդր Տարնավսկին CNN-ին ասել է, որ Ուկրաինան արդեն ստացել է կասետային զինամթերք ԱՄՆ-ից, բայց դեռ չի օգտագործել դրանք։
«Մենք նոր ենք դրանք ստացել, դեռ չենք օգտագործել, բայց դրանք կարող են արմատապես փոխել իրավիճակը։ Հակառակորդն էլ է հասկանում, որ այս զինամթերքը ձեռք բերելով՝ մենք առավելություն կստանանք։ Հակառակորդը զիջելու է տարածքների այն հատվածը, որտեղ հնարավոր է դրանք օգտագործել»,- ասել է բրիգադային գեներալ Տարնավսկին։
Նշենք, որ ընդամենը երեք օր առաջ ԱՄՆ-ը հայտարարեց Ուկրաինային կասետային զինամթերք փոխանցելու իր որոշման մասին՝ սովորական զինամթերքի պակասի պատճառով։ Այն, որ դրանք արդեն հասցվել են Ուկրաինա, մինչ այս պահը չի հաղորդվում։ Տարնավսկին ընդգծել է, որ ուկրաինական բանակը չի օգտագործի այդ զինամթերքը խիտ բնակեցված վայրերում։
ԱՄՆ-ը նույնպես նշում է, որ ուկրաինացիները խոստացել են չօգտագործել կասետային զինամթերք բնակեցված վայրերում և գրանցել դրանց օգտագործումը, որպեսզի հետագայում կարողանան ականազերծել այդ վայրերը։
Կասետային զինամթերքը նախատեսված է հիմնականում թշնամու կենդանի ուժի ոչնչացման համար. պայթելով՝ նման արկը, հրթիռը կամ ռումբը ցրում են տասնյակ փոքր «ռումբեր»: Միևնույն ժամանակ, շատ հաճախ դրանցից ոմանք չեն աշխատում և նույնիսկ մարտական գործողություններից հետո մահացու վտանգ են ներկայացնում խաղաղ բնակչության համար։
Տաթև Ֆռանգյան
