24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Ադրբեջանի ու Իսրայելի ՊՆ ղեկավարները ռազմավարական հարաբերությունների ամրապնդման հարցեր են քննարկել
Քաղաքականություն
13.07.2023 | 17:07
Ադրբեջանի ՊՆ ղեկավար Զաքիր Հասանովը Բաքվում հանդիպել է Իսրայելի պաշտպանության նախարար Յոավ Գալանտին։ Ադրբեջանի ՊՆ-ի հաղորդմամբ՝ կողմերը քննարկել են երկու երկրների միջև ռազմական համագործակցության զարգացման հեռանկարները։
«Հանդիպման ընթացքում քննարկվել են ռազմական, ռազմատեխնիկական ոլորտներում Ադրբեջանի և Իսրայելի միջև համագործակցության զարգացման հեռանկարները և փոխադարձ հետաքրքրություն ներկայացնող այլ հարցեր»,- ասվում է հաղորդագրության մեջ։
Հասանովը հայտարարել է, որ երկու երկրների միջև գործընկերության բարձր մակարդակը «կարևոր դեր է խաղում ոչ միայն պետությունների զարգացման, այլև ամբողջ տարածաշրջանում անվտանգության ապահովման գործում»։
Իր հերթին, Գալանտն ասել է, որ Իսրայելի պաշտպանության նախարարի կարգավիճակում առաջին անգամ է այցելում Ադրբեջան, և ընդգծել, որ «ադրբեջանա-իսրայելական հարաբերությունները հիմնված են բարեկամության և փոխադարձ վստահության վրա»։
«Հանդիպմանն ընդգծվել է փոխայցելությունների կարևորությունը ռազմական համագործակցության հետագա ընդլայնման տեսանկյունից: Հատուկ ընդգծվել է ռազմավարական հարաբերությունների հետագա ամրապնդման և անվտանգության կապերի ընդլայնման կարևորությունը»,- ասվում է հաղորդագրության մեջ։
Հավելենք, որ այսօր ավելի վաղ Իսրայելի ՊՆ ղեկավարը հանդիպել էր Ադրբեջանի նախագահ Իլհամ Ալիևին։
Էմմա Չոբանյան
