25.01.2026 | 19:44
Նռնակի պայթյուն Գորիսում. կա երկու զոհ
Հուլիսի 14-15-ին սպասվում է եռակողմ հանդիպում, ակնկալվում է միջանցքի հարցով հստակ որոշում․ Արցախի պետնախարար․ ՏԵՍԱՆՅՈՒԹ
Քաղաքականություն
12.07.2023 | 18:43
Արցախի «Միջանցքի ապաշրջափակման ժողովրդական շարժման շտաբ»-ն այսօր Ստեփանակերտում ակցիա է նախաձեռնել՝ հանրությանը միանալու կոչ անելով։ Շարժման նախաձեռնող խմբի անդամ Դավիթ Վանյանն «Արցախպրես»-ին ասել է, որ «Միջանցքի ապաշրջափակման համաժողովրդական շարժման» նպատակը միջանցքը բացելու արշավ սկսելն է։
Այսօրվա ակցիայի մասնակիցները քայլերթով շարժվել են դեպի Վերածննդի հրապարակ՝ իշխանությանն ու պետական մարմիններին կոչ անելու կա՛մ միանալ իրենց, կա՛մ համապատասխան ռեսուրսներ՝ մեքենա, բենզին տրամադրել, որպեսզի գնան ճանապարհը բացելու։
Քայլերթի մասնակիցները հանդիպել են Արցախի պետնախարար Գուրգեն Ներսիսյանի հետ, որը տեղեկացրել է, որ ԱՀ նախագահ Արայիկ Հարությունյանի մասնակցությամբ քննարկում է տեղի ունեցել։
«Քննարկման արդյունքում նախագահի կողմից ներկայացվեց, որ հուլիսի 14-15-ին սպասվում է եռակողմ հանդիպում, որից ակնկալում ենք միջանցքը ապաշրջափակելու հետ կապված հստակ որոշում»,- հայտնել է Գուրգեն Ներսիսյանը, որը ֆեյսբուքյան ուղիղ հեռարձակմամբ ներկայացրել է նախաձեռնության հեղինակներից Արթուր Օսիպյանը։
Արցախի պետնախարարը նաև շեշտել է՝ ամբողջ ժողովուրդը մի մարդու պես մասնակցելու է համաժողովրդական շարժմանը՝ պետական ծառայող-ոչ պետական ծառայող տարբերակում չի լինելու։
«Բոլորս միակարծիք ենք, հասկանում ենք, որ այդ համաժողովրդական շարժումն է իրավիճակից դուրս գալու միակ ելքը»,- հավելել է Արցախի պետնախարար Գուրգեն Ներսիսյանը։
Հավելենք, որ «Միջանցքի ապաշրջափակման ժողովրդական շարժման» անդամները պետնախարարի մասնակցությամբ նախագահականում քննարկել են իրենց պահանջներ։ Խոսքը, մասնավորապես, վառելիքի և ավտոբուսների տրամադրման մասին է, որոնցով հանրապետության մարզերից ցանկացողները հնարավորություն կունենա միանալ վաղը նախատեսված ակցիային։
Մանրամասները՝ տեսանյութում։
Անի Թամրազյան
