14.09.2026 | 10:21
Ուկրաինական ԱԹՍ-ները հարձակվել են Կրասնոդարի երկրամասի վրա․ Սոչիում հինգ մարդ է վիրավորվել
Բացեք ԵՄ-ին Թուրքիայի անդամակցության ճանապարհը․ Էրդողանը ՆԱՏՕ-ին Շվեդիայի միանալու նոր պայման է առաջ քաշում
Քաղաքականություն
10.07.2023 | 16:49
Թուրքիայի նախագահ Ռեջեփ Թայիփ Էրդողանը ՆԱՏՕ-ի գագաթնաժողովին մասնակցելու համար Վիլնյուս մեկնելուց առաջ օդանավակայանում մամուլի ասուլիսում մի շարք հայտարարություններ է հնչեցրել, փոխանցում են թուրքական լրատվամիջոցները։
Նա նշել է, որ գագաթնաժողովն անցկացվում է այն ժամանակ, երբ ուկրաինական պատերազմը մեծացրել է իր բացասական ազդեցությունը համաշխարհային կայունության և անվտանգության վրա։
«Նման կրիտիկական շրջանում գագաթնաժողովի մասնակիցները ծրագրում են քննարկել շատ կարևոր որոշումներ, որոնք, անշուշտ, կնպաստեն դաշինքի պաշտպանության ամրապնդմանը։ Միաժամանակ, նախատեսվում է դիտարկել ռազմաքաղաքական դաշինքի Մադրիդյան գագաթնաժողովում Ուկրաինայի վերաբերյալ ընդունված որոշումները»,- ասել է Թուրքիայի նախագահը՝ նշելով, որ Անկարան աջակցում է Ուկրաինայի տարածքային ամբողջականությանը, և որ պատերազմի ավարտն իր ներդրումը կունենա Կիևի՝ ՆԱՏՕ-ին անդամակցելու հարցում։
Գագաթնաժողովի օրակարգային մեկ այլ կետ էլ ՆԱՏՕ-ի ընդլայնումն է։ Ըստ Էրդողանի՝ Թուրքիան մի երկիր է, որը միշտ սատարել է ՆԱՏՕ-ի բաց դռների քաղաքականությունը։ Նա նշել է, որ ՆԱՏՕ-ին Շվեդիայի անդամակցության գործընթացում առաջընթացը կախված է եռակողմ համաձայնագրում արձանագրված հարցերի կատարումից։
Բացի այդ, Էրդողանը ՆԱՏՕ-ին Շվեդիայի անդամության հայտի վավերացման նոր պայման է առաջ քաշել։
«Սկզբում ճանապարհ բացեք Թուրքիայի՝ ԵՄ-ին անդամակցության համար, իսկ հետո մենք ճանապարհ կհարթենք ՆԱՏՕ-ին Շվեդիայի միանալու հայտի համար, ինչպես արեցինք Ֆինլանդիայի դեպքում»,- հայտարարել է Թուրքիայի նախագահը։
Հավելենք, որ ՆԱՏՕ-ի գագաթնաժողովին ընդառաջ՝ այսօր Էրդողանը Վիլնյուսում հանդիպելու է դաշինքի գլխավոր քարտուղարին ու Շվեդիայի վարչապետին։ Հուլիսի 11-12-ն էլ տեղի է ունենալու դաշինքի գագաթնաժողովը։
Էմմա Չոբանյան
