17.12.2025 | 16:42
Մարտունու մի գազալցակայանում հայտնաբերվել են թույլատրելի նորմը 8 և 10 անգամ գերազանցող շեղումներ
Լվովը գիշերը հրթիռակոծվել է․ կան մարդկային կորուստներ
Քաղաքականություն
06.07.2023 | 11:44
Անցած գիշեր Լվովը ռուսական հրթիռային հարձակման է ենթարկվել, չորս խաղաղ բնակիչ զոհվել է։ Այս մասին հայտնում է Ուկրաինայի ՆԳՆ-ն։ RBC-Ukraine-ի տվյալներով, ընդհանուր առմամբ, տուժել է 32 մարդ, այդ թվում՝ մեկ երեխա։ Փրկարարները փլատակներից դուրս են բերել 7 մարդու, 64 մարդ տարհանվել է, հայտնել են նախարարությունից։
Քաղաքապետ Անդրեյ Սադովին հարվածն անվանել է Ուկրաինա Ռուսաստանի լայնամասշտաբ ներխուժման սկզբից ի վեր ամենամեծ հարձակումը քաղաքի քաղաքացիական ենթակառուցվածքների վրա: Նրա խոսքով՝ ռուսական հրթիռն ավերել է շուրջ 60 բնակարան։ Հրդեհ է բռնկվել, որն արագ մարվել է։ Ըստ քաղաքապետի, հնարավոր է, որ դեռ մարդիկ կան փլատակներում, որոնողափրկարարական աշխատանքները շարունակվում են։ Հարվածից վնասվել են նաև հարակից դպրոցի, գրասենյակային համալիրի շենքերը, շուրջ 50 ավտոմեքենա։
Տեղի իշխանությունները նաև հայտնում են «կրիտիկական ենթակառուցվածքի օբյեկտին» հարվածի մասին: Թե կոնկրետ ինչ օբյեկտի մասին խոսքը, չի նշվում, սակայն գրոհից հետո տեղեկություններ են ստացվել քաղաքում էլեկտրաէներգիայի անջատումների և բջջային կապի խափանումների մասին:
ՌԴ պաշտպանության նախարարությունը չի մեկնաբանել Լվովի վրա հրթիռային հարձակումը։ Մոսկվան մինչ այս բազմիցս հերքել է Ուկրաինայում քաղաքացիական ենթակառուցվածքների վրա կանխամտածված հարձակումների մասին տեղեկությունները՝ պնդելով, թե ռուսական բանակը թիրախավորում է միայն ռազմական թիրախները:
