14.09.2026 | 11:22
Սիսիանի «Մայիսի 28» զբոսայգու 10-րդ հողամասը վերադարձվել է համայնքին
Ֆրանսիայում հայտարարել են անկարգություններով պայմանավորված իրավիճակի կարգավորման մասին
Քաղաքականություն
05.07.2023 | 20:50
Ֆրանսիայում անկարգությունների հետ կապված իրավիճակը, որը բռնկվել էր ոստիկանի կողմից 17-ամյա դեռահասի սպանությունից հետո, գրեթե ամբողջությամբ կարգավորվել է։ Այս մասին հայտարարել է երկրի վարչապետ Էլիզաբեթ Բորնը, փոխանցում է ՌԻԱ Նովոստին։
«Վերջին գիշերներին բռնության նվազում է նկատվում, իրավիճակը գրեթե նորմալ է դարձել»,- ասել է նա՝ ելույթ ունենալով Սենատում։
Միաժամանակ, վարչապետը նշել է, որ իշխանությունները շարունակում են զգոն լինել և աստիճանաբար հարմարեցնել անվտանգության մեխանիզմները ստեղծված իրավիճակին։
Ըստ Բորնի՝ հասարակական կարգը վերականգնելու՝ կառավարության ռազմավարությունը հիմնված է չորս բաղադրիչի վրա․ իրավապահների լայնածավալ ներգրավում, իրավախախտումների համար ավելի խիստ պատիժ, սոցիալական ցանցերի համար պատասխանատվության ներդրում և անչափահաս երեխաների հանդեպ իրենց պատասխանատվության մասին ծնողներին հիշեցում։
Հիշեցնենք՝ անցած երեքշաբթի ոստիկանության աշխատակիցները Նանտերում ճանապարհային ստուգման ժամանակ կրակել էին 17-ամյա դեռահասի ուղղությամբ, որը, անվտանգության աշխատակիցների խոսքով, հրաժարվել էր կատարել իրենց պահանջները։ Ֆրանսիայի մի շարք քաղաքներում անկարգություններ են սկսվել, որոնք շարունակվում են արդեն մի քանի օր։
Տաթև Ֆռանգյան
