04.11.2024 | 22:14
Ադրբեջանը 4,7 մլն դոլար է վճարել լոբբիստներին՝ COP29-ից առաջ իր «ավտորիտար իմիջը մաքրելու» համար․ Democracy for Sale
Թուրքիայի ԱԳ նախարարը հայտարարել է, որ Շվեդիայում Ղուրանի այրումը հարցեր է առաջացնում ՆԱՏՕ-ին այդ երկրի միանալու հուսալիության առումով
Քաղաքականություն
04.07.2023 | 19:51
Թուրքիայի ԱԳ նախարար Հաքան Ֆիդանը Հորդանանի իր գործընկերոջ հետ Անկարայում հրավիրված ասուլիսում մի շարք հայտարարություններ է հնչեցրել, այդ թվում՝ Շվեդիայի հետ կապված, փոխանցում է Անադոլու գործակալությունը։
Նա, մասնավորապես, հայտարարել է, որ ՆԱՏՕ-ին Շվեդիայի անդամակցության հարցը վիճահարույց է մնում։
«Մենք խստորեն դատապարտում ենք Ստոկհոլմում Ղուրանի այրման սադրանքը և անընդունելի ենք համարում հակաիսլամական այդ քայլն արտոնելը՝ չնայած Թուրքիայի բոլոր նախազգուշացումներին»,- ասել է նա։
Ֆիդանը նշել է, որ Անկարան շարունակում է «հավատարիմ մնալ աշխարհում իսլամատյացության դրսևորումների անթույլատրելիության հստակ դիրքորոշման հարցում»։ Նա հիշեցրել է, որ աշխարհի տարբեր երկրներ դատապարտել են Ղուրանի այրման ակցիան։
«Այն փաստը, որ նման գործողություններն իրականացվում են իրավապահների պաշտպանության ներքո, բերում է որոշակի եզրակացությունների։ Շվեդիայի անվտանգության համակարգը չի կարողանում կանխել սադրիչ գործողությունները, և դա հարցեր է առաջացնում ռազմավարության և անվտանգության համատեքստում»,- ասել է Ֆիդանը։
Թուրք պաշտոնյան հավելել է, որ ռազմավարության և անվտանգության գնահատման համատեքստում Շվեդիայի՝ ՆԱՏՕ-ին անդամակցելու առավելությունների հարցը գնալով ավելի շատ վեճեր է առաջացնում։
Հիշեցնենք, որ հունիսի 28-ին 37-ամյա Սալվան Մոմիկան, որը մի քանի տարի առաջ Իրաքից փախել էր Շվեդիա, ոստիկանությունից թույլտվություն էր խնդրել բողոքի ակցիա անցկացնել և այրել մահմեդականների Սուրբ գիրքը՝ «Ղուրանի մասին իր կարծիքն արտահայտելու համար»։ Մոմիկան ոտքով հարվածել էր Ղուրանին, գրքի մեջ խոզապուխտ լցրել և այրել էջերը։ Մի շարք պետություններ, այդ թվում՝ Թուրքիան, որի աջակցությունն անհրաժեշտ է Շվեդիային՝ ՆԱՏՕ-ին միանալու համար, խստորեն դատապարտել են այս արարքը։
Էմմա Չոբանյան
