25.02.2026 | 23:29
Ինչպես են ադրբեջանցի գործարարները ՌԴ-ին օգնում շրջանցել պատժամիջոցները. FT-ի հետաքննությունը
Բորելը հաջորդ շաբաթ Չինաստան կմեկնի
Քաղաքականություն
04.07.2023 | 17:34
ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը հաջորդ շաբաթ կմեկնի Պեկին։ Այս մասին հուլիսի 4-ին հայտնել է Bloomberg-ը։
Ուղևորությունը կայանալու է այն ժամանակ, երբ Եվրոպան փորձում է հասկանալ՝ ինչպես վարվել Չինաստանի հետ տնտեսական մրցակցության ֆոնին:
Չինաստանում ԵՄ դեսպան Խորխե Տոլեդոն ասել է, որ Բորելը Պեկին կժամանի հաջորդ երկուշաբթի։ Նախատեսված են նրա հանդիպումները Չինաստանի արտաքին գործերի նախարար Ցին Գանգի և այլ բարձրաստիճան պաշտոնյաների հետ: Տոլեդոն ընդգծել է, որ ԵՄ-ն կշարունակի «ռազմավարական հարցեր» բարձրացնել Չինաստանի հետ հարաբերություններում, ներառյալ՝ մարդու իրավունքները և Ռուսաստանի պատերազմն Ուկրաինայում։ Կողմերը նաև կշարունակեն երկխոսությունը տնտեսական և առևտրային հարցերի շուրջ, հավանաբար, սեպտեմբերին, և կարող են ղեկավարների գագաթնաժողով անցկացնել տարեվերջին, հավելել է նա։
«Մենք ցանկանում ենք փոխգործակցել Չինաստանի հետ բոլոր՝ մեր գործընկերության, մեր մրցակցության և մեր համակարգային մրցակցության հարցերում»,- ասել է դեսպանը:
Միաժամանակ, Չինաստանի ԱԳ նախարարության խոսնակ Մաո Նինը երեքշաբթի կայացած ճեպազրույցում ասել է, որ տեղեկություն չունի Բորելի այցի մասին։
Տաթև Ֆռանգյան
