16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Պրիգոժինին են վերադարձրել 10 մլրդ ռուբլի կանխիկ գումարը, որն առգրավվել էր ապստամբությունից հետո
Քաղաքականություն
04.07.2023 | 15:55
«Վագներ» մասնավոր ռազմական խմբավորման հիմնադիր և ղեկավար Եվգենի Պրիգոժինին են վերադարձրել կանխիկ գումարով արկղերը, որոնք առգրավվել էին Պետերբուրգում զինված ապստամբության քրեական գործի շրջանակում խուզարկության ժամանակ։ Այս մասին հայտնել է «Фонтанка»-ն, որին վկայակոչում է Meduza-ն։
Լրատվամիջոցի տվյալներով՝ հուլիսի 2-ին Պրիգոժինի վարորդը ժամանել է պաշտոնական լիազորագրով գումարը ստանալու։ Ընդհանուր առմամբ, նրան վերադարձվել է տասը միլիարդ ռուբլի և հարյուր հազարավոր դոլար կանխիկ գումար, ինչպես նաև հինգ ձուլակտոր ոսկի։
Նշվում է, որ ի սկզբանե քննիչները չեն ցանկացել վերադարձնել գումարը։
Հավելենք, որ հունիսի 24-ին Սանկտ Պետերբուրգում խուզարկություններ էին իրականացվել ապստամբության գործի շրջանակում։ «Տրեզինի» հյուրանոցի մոտ, որը համարվում է Պրիգոժինի գրասենյակը, հայտնաբերվել էր «Գազել», որում գտել էին չորս միլիարդ ռուբլի կանխիկ գումարով արկղեր։ River Palace հյուրանոցի ստորգետնյա կայանատեղիում հայտնաբերվել էր Citroen Jumper միկրոավտոբուսը, որի մեջ եղել է ևս 80 տուփ կանխիկ գումար՝ ընդհանուր վեց միլիարդ ռուբլի։
Բացի այդ, Պրիգոժինի գրասենյակից առգրավվել էր 5 կգ ոսկու ձուլակտոր, կանխիկ դոլար, վեց ատրճանակ, մի քանի կեղծ անձնագրեր։ Պրիգոժինը հայտարարել էր, որ այդ գումարով վճարելու էր խմբավորման վարձկաններին։
Հիշեցնենք, որ «Վագների» զինյալները Պրիգոժինի գլխավորությամբ ապստամբություն էին սկսել և Դոնի Ռոստովից շարժվել դեպի Մոսկվա, բայց չէին հասել մայրաքաղաք։ Հունիսի 24-ի երեկոյան Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։ Ըստ պայմանավորվածության՝ «Վագներն» ու Պրիգոժինը տեղափոխվելու էին Բելառուս, իսկ Պրիգոժինի նկատմամբ հարուցված քրեական գործը կարճվելու էր։
Էմմա Չոբանյան
