16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Հունգարիայի խորհրդարանը հետաձգել է ՆԱՏՕ-ին Շվեդիայի անդամակցության հայտի շուրջ քվեարկությունը
Քաղաքականություն
29.06.2023 | 18:08
Հունգարիայի խորհրդարանը հաջորդ շաբաթ ՆԱՏՕ-ին Շվեդիայի անդամակցության հայտի վերաբերյալ քվեարկություն չի անցկացնի՝ համաձայն հրապարակված օրակարգի, ինչը հետաձգում է արևմտյան դաշինք Ստոկհոլմի ընդունումը, գրում է US.News-ը՝ վկայակոչելով Reuters-ին։
Ընդդիմադիր «Դեմոկրատական կոալիցիա» կուսակցության պատգամավոր Ագնես Վադայը Reuters-ին ասել է, որ իշխող «Ֆիդես» և «Քրիստոնեա-դեմոկրատական» կուսակցություններից օրենսդիրները հանձնաժողովի նիստի ժամանակ չեն աջակցել քվեարկությունը հաջորդ շաբաթվա խորհրդարանի լիագումար նիստի օրակարգում ներառելուն:
«Հանձնաժողովը մերժել է քվեարկությունը հաջորդ շաբաթվա օրակարգ մտցնել»,- ասել է Վադայը՝ նշելով, որ իր կուսակցությունը կրկին կառաջարկի քվեարկությունն անցկացնել երկուշաբթի՝ խորհրդարանի լիագումար նիստում։
Նա նաև նշել է, որ «ակնհայտ է», որ իշխող «Ֆիդես»-ը կորոշի՝ երբ նշանակել քվեարկությունը՝ կախված Թուրքիայի դիրքորոշումից։
«Վարչապետ Վիկտոր Օրբանը գործում է Թուրքիայի նախագահ Թայիփ Էրդողանի հետ համատեղ՝ անտեսելով Հունգարիայի ինքնիշխանությունը և խախտելով ՆԱՏՕ-ի միասնությունը»,- ասել է նա:
Հունգարիայի կառավարության խոսնակը և ԱԳՆ-ն չեն պատասխանել էլեկտրոնային փոստով ուղարկված լրատվամիջոցի հարցերին:
Հավելենք, որ Թուրքիան և Հունգարիան ՆԱՏՕ-ի միակ անդամներն են, որոնք չեն վավերացրել դաշինքին միանալու՝ Շվեդիայի հայտը։
Էմմա Չոբանյան
