ԱՄՆ-ը միակն է, որն ունակ է ՀՀ-ին և Ադրբեջանին առաջարկներ անել և իրականացնել․ Վաշինգտոնի նոր հանդիպումն այդ նպատակով է․ Անահիտ Ադամյան․ ՏԵՍԱՆՅՈՒԹ

Factor TV-ի հարցազրույցը «Հանրապետություն» կուսակցության ներկայացուցիչ Անահիտ Ադամյանի հետ

-Տիկի՛ն Ադամյան, ինչպե՞ս եք գնահատում ՀՀ-ի կողմից Ադրբեջանի տարածքային ամբողջականության ճանաչումը՝ ներառյալ Լեռնային Ղարաբաղը, մի բան, որ վարչապետն ասաց, ի դեպ, դրան հաջորդեց Ադրբեջանի նախագահի սպառնալիքը, որ լուծարեք ԼՂ պետական մարմինները, նախագահը, մնացյալ պաշտոնյաները պետք է հրաժարական տան, անգամ նախագահը հանձնվի՝ այդ դեպքում համաներում կարվի։ Եթե Փաշինյանը չճանաչեր տարածքային ամբողջականությունը, Ալիևը նման բան կասե՞ր։

-Միանշանակ։ Ես կարծում եմ՝ Իլհամ Ալիևը բացարձակապես խնդիր չուներ ՀՀ-ի կողմից Ադրբեջանի սահմանները ճանաչելու կամ Ադրբեջանի կողմից Հայաստանի սահմանները ճանաչելու հետ։ Նախ՝ արձանագրենք այն իրողությունը, որ ՀՀ-ին չափազանց անհրաժեշտ են իր սահմանների միջազգային ճանաչումը։ Երկրորդ՝ եկեք հաշվի առնենք, թե Ալիևն այդ հայտարարությունը երբ և որտեղ արեց։

-Լաչինում՝ այն բանից հետո, երբ ՀՀ-ն հրապարակայնորեն ճանաչեց Ադրբեջանի տարածքային ամբողջականությունը։

-Իսկ գուցե այն բանից առաջ, երբ Քիշնևում Ալիևը գնում էր հնգակողմ հանդիպմա՞ն։ Ես ավելի շատ կարծում եմ, որ Ալիևի այդ հայտարարությունն ուղղված էր հնգակողմ հանդիպմանը։ Պատկերացրեք՝ Իլհամ Ալիևը հանդիպում է մի միջավայրում, սեղանի շուրջ նստում է այն մարդկանց հետ, որոնք ներկայացնում են ժողովրդավարական երկրներ, և հայտնվում է ժողովրդավարական երկրների շրջապատում՝ իբրև միակ բռնակալ։ Ալիևի համար շատ կարևոր էր այդ շրջապատում իր բանակցային դիրքերն ամրապնդելը։ Եթե հիշում եք՝ նախ նա փորձեց տպավորություն ստեղծել, որ ինքը չի համաձայնում գնալ հնգակողմ ֆորմատին, ես չէ, որ ձեզ պետք է պատմեմ, թե Ադրբեջանի ԱԳՆ-ն ինչ հայտարարություններ էր անում Ֆրանսիայի, մասնավորապես՝ Էմանուել Մակրոնի մասին։

-Այսօր էլ են արել՝ միակողմանիության մեջ մեղադրելով։

-Ի դեպ՝ զարմանալի է, որ, երևի թե, միակ երկրի դեմ է Ադրբեջանի ԱԳՆ-ն հայտարարություն տարածել՝ Ելիսեյան պալատի հայտարարության դեմ։ Մնում է պատկերացնել, թե ինչ է ասել այնտեղ Էմանուել Մակրոնը։ Փորձենք պատկերացնել Ալիևի պաշտպանական պատյանները։ Նա իր համար ստեղծում էր բանակցային լավ մեկնարկի պայմաններ՝ «եկեք ինձ շնորհակալություն հայտնեք, որ ես ընդհանրապես եկա, ինձ չհամոզեք ինձ, որ պետք է իմ պարտավորությունները կատարեմ որևէ բանակցություններում ստանձնած և, ընդհանրապես, հիշեք, որ 2020 է եղել, ու ես հաղթել եմ»։ Ալիևի ամբողջ կեցվածքը դա էր։

Հարցազրույցն ամբողջությամբ՝ տեսանյութում։

Ռոբերտ Անանյան