05.06.2026 | 15:25
Դիմում ենք ԿԸՀ՝ «Ուժեղ Հայաստանի» մասնակցությունը կասեցնելու հարցով․ կպահանջենք դիմել դատարան․ Անահիտ Ադամյան. ՏԵՍԱՆՅՈՒԹ
1918 թվականը մեր երկրի վերածննդի խորհրդանիշն է ու ժառանգությունը. ԱԺ նախագահի ուղերձը
Քաղաքականություն
28.05.2023 | 11:08
ՀՀ ԱԺ նախագահ Ալեն Սիմոնյանը շնորհավորական ուղերձ է հղել Հանրապետության տոնի առթիվ, որում նշված է.
«Սիրելի՛ հայրենակիցներ,
Շնորհավորում եմ Առաջին Հանրապետության տոնի առթիվ:
Հանրապետության քաղաքացի լինելը, որքան էլ այդ ժամանակների համար անծանոթ իրողություն էր, այնուամենայնիվ, նոր դարաշրջանի սկիզբն էր, որն անշրջելի էր լինելու ժողովրդավարության և մեր օրերի Հանրապետությանը հասնելու համար:
Մեր ժողովրդի համար օրհասական պահին ստեղծված Հանրապետությունը ինքնակազմակերպման, ընտրությունների միջոցով կամարտահայտության և ազատատենչության կարևոր մարմնավորումն էր:
Ամեն տարի այս օրը մենք հպարտությամբ ենք հիշում 1918 թվականի մայիսի 28-ին Սարդարապատի, Բաշ-Ապարանի, Ղարաքիլիսայի հերոսամարտերը, մեր հերոսներին, որոնց անհավանական սխրանքները փառավորում են մեր ինքնությունը, սնում մեր էությունը: Եվ ինչպես մեր գոյամարտի վերաբերյալ տարբեր աշխատություններում է գրված. «Ճակատամարտը շահված էր, Հայաստանը՝ փրկված»:
Առաջին հանրապետությունը երկար կյանք չունեցավ, բայց անուրանալի դասեր թողեց հայոց պատմության էջերում, որոնք ուսումնասիրման, առերեսման և խորհելու մեծ հնարավորություն են տալիս սերունդներին:
1918 թվականը մեր երկրի վերածննդի խորհրդանիշն է ու ժառանգությունը, մեր պետականության հիմնաքարը, որի դրական և մնայուն արժեքները պահպանելու և ամրացնելու պատասխանատվություն ունենք:
Շնորհավոր տոնդ Հայաստանի առաջին հանրապետություն, հարգանք և խոնարհում պետականության ճանապարհին ընկած հերոսների և այն կերտող պետական գործիչների հիշատակին»:
