13.09.2026 | 13:39
Սեպտեմբերի 13-18-ին Հայաստանում տեղումներ չեն սպասվում․ ջերմաստիճանը կբարձրանա 2-4 աստիճանով
Թուրքիայի քրդական կուսակցությունը հայտարարել է ընտրություններում Էրդողանի գլխավոր մրցակցին աջակելու մասին
Քաղաքականություն
28.04.2023 | 15:18
Թուրքիայի քրդամետ Ժողովուրդների դեմոկրատական կուսակցության (HDP) համանախագահ Միդհաթ Սանջարը հայտարարել է, որ առաջիկա նախագահական ընտրություններում աջակցելու են գործող նախագահ Ռեջեփ Թայիփ Էրդողանի գլխավոր մրցակիցին՝ ընդդիմադիր առաջնորդ Քեմալ Քըլըչդարօղլուին, գրում է Gercek News-ը։
Sozcu պարբերականի սյունակագիր Իսմայիլ Սայմազին տված հարցազրուցում Սանջարն ասել է, որ իրենց նպատակն է վերջ տալ միանձնյա կառավարմանը, և որ Քըլըչդարօղլուի ծրագիրը համահունչ է իրենց նպատակներին: Նա հավելել է, որ իրենք նախարարական կամ այլ պաշտոնների պահանջ չունեն Քըլըչդարօղլուից։
Սա առաջին դեպքն է, երբ HDP-ն բացահայտորեն հայտարարում է Քըլըչդարօղլուին աջակցելու մասին։
Սանջարը նաև ասել է, որ իրենք այս ընտրությունները համարում են ամենակարևորը Թուրքիայի պատմության մեջ և ունեն երկու ռազմավարական նպատակ. առաջինը՝ վերջ տալ միանձնյա կառավարմանը, երկրորդ՝ դառնալ ժողովրդավարական վերափոխման ամենաարդյունավետ ուժը:
Նա հայտարարել է, որ ներկա կառավարությունը երկիրը հասցրել է աղետի եզրին, և որ միանձնյա կառավարման դադարեցումն անհրաժեշտ է երկիրը փրկելու համար։ Նա կարծում է, որ Քըլըչդարօղլուի հաղթանակը նշանակալի քայլ կլինի դեպի ժողովրդավարություն և օրենքի գերակայություն ճանապարհ բացելու համար։ Միաժամանակ, սակայն, Սանջարն ասել է, թե չեն սպասում, որ Քըլըչդարօղլուի հաղթանակն անմիջապես և արմատական փոփոխություն կբերի երկրում։
Էմմա Չոբանյան
