23.11.2024 | 14:29
ՆԱՏՕ-ի ղեկավար Մարկ Ռյուտեն բանակցություններ է վարել Դոնալդ Թրամփի հետ
«Գնացել էի մարզչիս վերջին խոսքերը կատարելու»․ Եվրոպայի փոխչեմպիոն Տաթև Հակոբյանի ուղին․ ՏԵՍԱՆՅՈՒԹ
Հասարակություն
27.04.2023 | 19:45
Ծանրամարտի Եվրոպայի փոխչեմպիոն հռչակված Տաթև Հակոբյանն ասում է՝ մեծ է պատասխանատվությունը, երբ միջազգային մրցույթի ես մասնակցում հայրենի հողում, իսկ մարզասերների աջակցությունը կրկնակի ուժ է փոխանցում։
Տաթև Հակոբյանն առաջնությանը հանդես է եկել 76 կգ քաշային կարգում։ Երկու վարժությունների հանրագումարով 226 կգ արդյունքով արծաթե մեդալ է նվաճել։ Պոկում վարժությունում ևս արժանացել է արծաթե մեդալի, իսկ հրում վարժությունում՝ փոքր բրոնզե մեդալի։ Տաթևի խոսքով՝ ընտանիքում բոլորն ուժային մարզաձևերով են զբաղվել։ Առաջին անգամ 17 տարեկանում է միջազգային մրցույթների մասնակցել, տարբեր մեդալների և մրցանակների արժանացել։
Տաթևը համառ և հետևողական գնում է իր հաջողությունների հետևից․ այսպես է ծանրորդին նկարագրում մարզիչը՝ Արթուր Մանուկյանը։ Ըստ նրա՝ Տաթևն ահռելի աշխատանք է կատարում, իսկ լավագույն մարզիկների շարքերում հայտնվելու երազանքն ու ձգտումը վկայում են՝ ծանրամարտում նոր արդյունքներ կլինեն։
Երևանում անցկացված ծանրամարտի Եվրոպայի առաջնությունը ևս մեկ միջոց էր հանրայնացնելու ծանրամարտը՝ ասում է Արթուր Մանուկյանը։ Մարզչի կարծիքով՝ այն նաև ապացուցեց, որ և՛ կանայք, և՛ տղամարդիկ կարող են հավասար մասնակցություն ունենալ այս մարզաձևում։
Տաթևը ծանրամարտով զբաղվում է 10 տարուց ավելի։ Ասում է՝ մի շրջան ընդմիջել է և ուժային մեկ այլ սպորտաձևով՝ մասռեսլինգով զբաղվել, որտեղ նույնպես հաջողություններ է գրանցել՝ մասնակցելով միջազգային մրցույթների։
Մանրամասները՝ տեսանյութում։
Անի Թամրազյան
