26.11.2024 | 12:29
ԱՄՆ-ում Դոնալդ Թրամփի դեմ երկու քրեական գործ է կարճվել
Թուրքիայի առողջապահության նախարարը խոսել է Էրդողանի հիվանդության մասին
Քաղաքականություն
27.04.2023 | 17:32
Թուրքիայի առողջապահության նախարար Ֆահրեթթին Քոջան Քոնյայում միջոցառման ժամանակ խոսել է իշխող «Արադարություն և զարգացում» կուսակցության և երկրի նախագահ Ռեջեփ Թայիփ Էրդողանի առողջական վիճակի մասին, գրում է BirGün-ը։
Նա նշել է, որ Էրդողանի մոտ «գաստրոէնտերիտային վարակ» է, որի ազդեցությունը նվազել է, և Թուրքիայի նախագահի առողջական վիճակը լավ է։
«Ես խոսել եմ մեր նախագահի հետ, նա ողջունում է ձեզ։ Գիտեմ, որ հետևում եք մեր նախագահի առողջական վիճակին։ Այսօր առավոտյան ես նրա հետ էի։ Նրա առողջական վիճակը լավ է։ Նրա գաստրոէնտերիտ վարակի ազդեցությունը նվազել է։ Նա հնարավորինս արագ վերսկսի նախընտրական ծրագիրը»,- ասել է նախարարը։
Հավելենք, որ առողջական խնդիրների պատճառով Էրդողանը տեսակապով է մասնակցելու թուրքական «Աքքույու» ատոմակայանի միջուկային վառելիքի բեռնման միջոցառմանը։
Նախօրեից չհաստատված լուրեր էին շրջանառվում, որ Էրդողանը սրտամկանի կաթված է ստացել և գտնվում է հիվանդանոցում՝ ծանր վիճակում։ Այս տեղեկությունը, սակայն, հերքել են Թուրքիայի նախագահականը, ինչպես նաև փոխնախագահ Ֆուադ Օքթայը։
Հիշեցնենք, որ Էրդողանի ինքնազգացողությունը վատացել էր Kanal 7-ի և Ulke TV-ի համատեղ ուղիղ եթերում հարցազրույցի ժամանակ, որի պատճառով հեռարձակումը դադարեցվել էր։ Եթեր վերադառնալուն պես Էրդողանն անդրադարձել էր իր առողջական խնդիրներին՝ նշելով, որ ինտենսիվ քարոզարշավի պատճառով ստամոքսի հետ կապված խնդիրներ ունի։ Երեկվա նախընտրական հանդիպումներն էլ Էրդողանը չեղարկել էր «բժիշկների խորհրդով՝ տանը հանգստանալու համար»։ Այսօրվա հանդիպումները ևս չեղարկվել են։
Էմմա Չոբանյան
