15.09.2026 | 15:02
Ենթադրաբար, Հայկ Սարգսյանը կհեռացվի կուսակցությունից նկատողության պարագայում. Ալեքսանյան․ ՏԵՍԱՆՅՈՒԹ
Այսօր թարմացնում ենք այլևս երբեք ցեղասպանություն թույլ չտալու խոստումը․ Ջո Բայդենի ուղերձը՝ Հայոց ցեղասպանության 108-րդ տարելիցին
Քաղաքականություն
24.04.2023 | 16:41
ԱՄՆ նախագահ Ջո Բայդենը Հայոց ցեղասպանության 108-րդ տարելիցի կապակցությամբ հանդես է եկել հայտարարությամբ, որը հրապարակել է Սպիտակ տունը։
«Այսօր մենք հիշում ենք Մեծ եղեռնի՝ Հայոց ցեղասպանության ժամանակ կորսված կյանքերը և վերականգնում ենք այն երբեք չմոռանալու մեր խոստումը: 1915 թվականի ապրիլի 24-ին Օսմանյան իշխանությունները ձերբակալեցին Կոստանդնուպոլսի հայ մտավորականներին և համայնքի ղեկավարներին, ինչը սկիզբ դրեց հայ համայնքի դեմ բռնության համակարգված արշավին: Հետագա տարիներին մեկուկես միլիոն հայեր տեղահանվեցին, կոտորվեցին կամ մահվան երթի դուրս եկան․ ողբերգություն, որն ընդմիշտ ազդեց հայ ընտանիքների սերունդների վրա: Այսօր մենք միանում ենք աշխարհի ազգերին՝ հիշելու այս ցավալի պատմությունը, մենք նաև անդրադառնում ենք հայ ժողովրդի տոկոնությանն ու վճռականությանը»,-ասվում է Սպիտակ տան տարածած հայտարարության մեջ։
Նշվում է, որ ողջ մնացածներից շատերը ստիպված եեն եղել նոր կյանք սկսել նոր երկրներում, այդ թվում՝ Միացյալ Նահանգներում։ Այստեղ և ամբողջ աշխարհում հայ ժողովուրդը հույսով է դիմակայել ատելության չարիքին։
«Նրանք վերակառուցեցին իրենց համայնքները: Նրանք դաստիարակեցին իրենց ընտանիքներն ու պահպանեցին իրենց մշակույթը: Նրանք հզորացրին մեր ազգը։ Նրանք նաև պատմեցին իրենց և իրենց նախնիների պատմությունները՝ հիշելու և ապահովելու համար, որ 108 տարի առաջ տեղի ունեցած ցեղասպանությունն այլևս երբեք չկրկնվի: Այսօր եկեք թարմացնենք այս խոստումը։ Եկեք կրկին պարտավորվենք խոսել ատելության դեմ, պաշտպանել մարդու իրավունքները և կանխել վայրագությունները: Եվ միասին եկեք կրկնապատկենք մեր ջանքերը՝ կերտելու ավելի լավ ապագա, որտեղ բոլոր մարդիկ կարող են ապրել արժանապատվությամբ, ապահովությամբ և հարգանքով»,- ասվում է հայտարարության մեջ։
Էմմա Չոբանյան
