15.11.2024 | 13:49
Պուտինն Ալիևի հետ հեռախոսազրույցում ռազմավարական գործընկերության զարգացման հարցեր է քննարկել
«Հանդիպումը քաղաքական չի լինելու». Դավիթ Բաբայանը՝ Ադրբեջանին ուղղված բանակցությունների առաջարկի մասին
Քաղաքականություն
11.04.2023 | 14:41
«Սա քաղաքական հանդիպում չի լինելու»,- Factor.am-ի հարցին ի պատասխան ասաց Արցախի նախագահի խորհրդական Դավիթ Բաբայանը՝ անդրադառնալով Ստեփանակերտի կողմից Բաքվին ուղղված հանդիպման առաջարկին։
Հիշեցնենք՝ այսօր առավոտյան Արցախի տեղեկատվական շտաբը հայտարարություն էր տարածել, որ Արցախի իշխանությունները Ռուսաստանի Դաշնության խաղաղապահ առաքելության միջոցով, վերջիններիս տեղակայման վայրում և զորախմբի հրամանատարության միջնորդությամբ հանդիպում անցկացնելու առաջարկ են փոխանցել ադրբեջանական կողմին՝ հումանիտար բնույթի անհետաձգելի հարցեր քննարկելու համար։
«Արցախի շրջափակման 121-րդ օրն է, հումանիտար մի շարք խնդիրներ ունենք, որոնց լուծման համար անհրաժեշտ է այդ հանդիպումը. Լաչինի միջանցքի, գազամատակարարման, էլեկտրաէներգիայի, սննդի և այլ հարցերի քննարկում ենք նախատեսում այդ հանդիպման օրակարգում»,- մանրամասնեց Բաբայանը։
Հարցին՝ ադրբեջանական կողմն արդեն արձագանքե՞լ է հանդիպման առաջարկին, ԱՀ նախագահի խորհրդականը ոչ միանշանակ պատասխան տվեց.
«Այս պահին ոչինչ ասել չեմ կարող, հետագա մանրամասների մասին կրկին հաղորդագրություն կտարածենք»։
Հիշեցնենք՝ դեկտեմբերի 12-ից Ադրբեջանը փակ է պահում Արցախը Հայաստանին կապող միակ ճանապարհը։ Շուշիի հատվածում միջանցքը փակած ադրբեջանցիներն իրենց անվանում են անկախ բնապահպաններ, թեև նրանց նույնականացումն այլ բան է վկայում։ 121 օր է՝ արցախցիներն ապրում են ադրբեջանական շրջափակման մեջ՝ կյանքի տարրական իրավունքներից զրկված։ Առաջին անհրաժեշտության սնունդը, միրգն ու բանջարեղենը կտրոններով են, հոսանքը՝ հովհարային անջատումներով, գազամատակարարումը՝ Ադրբեջանի հայեցողությամբ, խափանումներով։
Ռոզա Վարդանյան
