Գլխավոր դատախազն ի՞նչ վարքագիծ պետք է դրսևորի, երբ նրա ներկայությամբ սպառնալիք հնչի․ Խաչատրյան․ ՏԵՍԱՆՅՈՒԹ

ԱԺ-ում քննարկվում է «Քաղաքացիական պայմանագիր» խմբակցության կողմից առաջադրած ՄԻՊ թեկնածուի՝ Անահիտ Մանասյանի ընտրության հարցը։

«Հայաստան» խմբակցության պատգամավոր Արթուր Խաչատրյանն Անահիտ Մանասյանին խնդրեց պատասխանել՝ ի՞նչ պետք է անի գլխավոր դատախազը, դատախազի տեղակալը, ոստիկանը կամ ՄԻՊ թեկնածուն, երբ իր ներկայությամբ սպառնալիքներ և վիրավորանքներ են հնչում։

Անահիտ Մանասյանը պատասխանեց, որ հարցադրումը չի ենթադրում էթիկայից բխող պատասխան, ուստի չի պատասխանի։

Արթուր Խաչատրյանն այս պատասխանից փոքր ինչ վրդովվեց․ «Ի՞նչն էր էթիկայի խախտում։ Եթե այդպես էթիկայի պաշտպան եք, որ ձեր ներկայությամբ էթիկա են խախտում, վախեցա՞ք միջամտել։ Ներկա չէիք, բայց մոտակայքում էինք, գիտեիք փաստը»։

Հիշեցնենք, որ ԱԺ մարդու իրավունքների պաշտպանության և հանրային հարցերի մշտական հանձնաժողովի ապրիլի 4-ի նիստում ՄԻՊ թեկնածուների քննարկումը թեժ վեճերով է ուղեկցվել․ ընդդիմության թեկնածու Էդգար Ղազարյանը 2018թ․-ի հեղափոխությունն անվանել է «ադրբեջանաթուրքական գործընթաց»՝ պարզաբանելով, որ ոչ թե ժողովրդին նկատի ունի, այլ գործընթացի շահառուներին և հետևանքները։ Իսկ ՔՊ-ականներից Արթուր Հովհաննիսյանը, Ռուստամ Բաքոյանը և այլք աչքի են ընկել «լեզուն կկտրեմ նրա, ով նման բան կասի», «անասուն», «կլոուն» և նմանօրինակ այլ արտահայտություններով։

Արթուր Խաչատրյանը նորից հարցրեց՝ ո՞րն է Անահիտ Մանասյանի գնահատականը կատարվածի վերաբերյալ։

Մանրամասները՝ տեսանյութում։