Ռուբեն Վարդազարյանի պաշտպանը բացարկի միջնորդություն ներկայացրեց դատավոր Վահե Դոլմազյանին․ ՏԵՍԱՆՅՈՒԹ

Բարձրագույն դատական խորհրդի նախագահ Ռուբեն Վարդազարյանի գործով դատական նիստի ընթացքում պաշտպան Արամ Օրբելյանն ինքնաբացարկի միջնորդություն ներկայացրեց նիստը նախագահող դատավոր Վահե Դոլմազյանին:

Պաշտպանի խոսքով` դատավորն ակնհայտորեն հանդես է գալիս մեղադրանքի կողմում, մինչդեռ իրավունք չունի հանդես գալու ո՛չ մեղադրանքի, ո՛չ պաշտպանական կողմում: Նշենք, որ նախորդ դատական նիստերի ընթացքում Արամ Օրբելյանը ներկայացրել է միջնորդություն` Վարդազարյանի նկատմամբ քրեական հետապնդումը դադարեցնելու վերաբերյալ` նշելով, որ նախկին քրեական օրենսգիրքը, որով մեղադրանք է առաջադրվել Վարդազարյանին, ուժը կորցրած է ճանաչվել, հետևաբար Վարդազարյանին վերագրվող նորմն այլևս գոյություն չունի: Մեղադրանքի կողմն էլ պնդել է, որ Վարդազարյանին վերագրվող, արդարադատության իրականացմանը խոչընդոտելու վերաբերյալ նորմը առկա է նաև այժմ գործող օրենսգրքում, այն չի ապաքրեականացվել: Դատարանը պաշտպանի միջնորդությունը մերժել է:

Օրբելյանն այսօր դատարանում մեջբերեց միջնորդությունը մերժելու վերաբերյալ դատարանի հայտնած դիրքորոշումները` փորձելով հիմնավորել, որ դատավորն այնհայտ կողմնակալ է, և փորձում է հիմնավորել մեղադրանքի կողմի տեսակետը:

Հիշեցնենք, որ ըստ Վարդազարյանին մեղսագրվող արարքի` վերջինս Լուռու մարզի ընդհանուր իրավասության դատարանի դատավոր Անդրանիկ Սիմոնյանին փորձել է հարկադրել, համոզել ազատ արձակել «Ալավերդցի Վահագն» անունով հայտնի Վահագն Աբգարյանին, որը մեղադրվում է սպանության մեջ:

Դատախազ Աշոտ Ժամկոչյանն առարկեց միջնորդության դեմ` նշելով, որ դատարանի կայացված դատական ակտը չի կարող նրան ինքնաբացարկ հայտնելու հիմք հանդիսանալ: Արամ Օրբելյանը պարազաբանեց, որ ինքը ոչ թե ինքնին դատական ակտն է դրել ինքնաբացարկի հիմքում, այլ դրանում տեղ գտած ձևակերպումները: Դատարանը հեռացավ առանձին սենյակ` միջնորդության վերաբերյալ որոշում կայացնելու:

Արաքս Մամուլյան