Որոշակիորեն խաթարվել է ԲԴԽ անդամի արդար ընտրություն կատարելու հնարավորությունը. դատավոր․ ՏԵՍԱՆՅՈՒԹ

Դատավորներն այսօր ընդհանուր ժողով են հրավիրել։ Օրակարգում Բարձրագույն դատական խորհրդի երկու դատավոր անդամի ընտրության հարցն է։

Ապրիլի 9-ին լրանում է ԲԴԽ դատավոր անդամներ Սերգեյ Չիչոյանի և Անի Մխիթարյանի՝ որպես ԲԴԽ անդամի պաշտոնավարման ժամկետը, ուստի նրանց փոխարեն պետք է երկու նոր դատավոր անդամ ընտրվի։

Իր թեկնածությունն է առաջադրել երեք դատավոր՝ Վերաքննիչ քրեական դատարանից Արշակ Վարդանյանը և Ռուբիկ Մխիթարյանը և Սնանկության դատարանից՝ Արթուր Աթաբեկյանը։

ԲԴԽ անդամների ընտրելու վերաբերյալ ոչ բոլոր դատարաններն են ծանուցումներ ստացել, ինչով որոշակիորեն խաթարվել է արդար ընտրություն կատարելու հնարավորությունը: Այս մասին այսօր՝ ապրիլի 7-ին, լրագրողների հետ զրույցում ասաց Երևանի ընդհանուր իրավասության դատարանի դատավոր Դավիթ Հարությունյանը:

«Թերահավատորեն կարելի է մոտենալ՝ Դատական դեպարտամենտը՝ ինքնուրո՞ւյն է որոշել՝ ինչպես պետք է ձևավորվի ԲԴԽ-ն, և եթե ԲԴԽ-ն համաձայն չէ Դեպարտամենտի տրամաբանության հետ՝ միջոցներ ձեռնարկե՞լ է, թե՝ ոչ։ Ես այս բովանդակությամբ հարցեր եմ ուղղել ԲԴԽ-ին և դեռ պատասխաններ չեն ստացվել։ Տրամաբանությունն այն է, որ առաջին ատյանի բոլոր դատարանները պետք է ծանուցվեն, իսկ այս տրամաբանությամբ կստացվի, որ օրինակ՝ Երևանի քրեական դատարանի, Վերաքննիչ քրեական, Վերաքննիչ քաղաքացիական դատարաններից ԲԴԽ անդամ երբևէ չի կարող ընտրվել»,- նշեց դատավորը։

Դավիթ Հարությունյանը համոզված է, որ կընտրվեն արժանի թեկնածուները, որոնք կստիպեն, ինչպես ԲԴԽ որոշ անդամներ են նշում, խախտել միանձնյա կոնսենսուսը, որը բնավ հարիր չէ սահմանադրական խորհրդակցական մարմնին:

Դավիթ Հարությունյանի կարծիքով՝ վերջին վեց ամսվա ընթացքում 20-ից ավելի դատավորի լիազորություններ դադարեցվել են ապօրինի կերպով։

«Վերջին մեկ տարվա ընթացքում Դատավորների միությունը հանդես է գալիս դատավորների անկախության, դատական իշխանության պաշտպանության դերերից, այն ինչ պետք է աներ ԲԴԽ-ն։ Եթե ԲԴԽ-ն պատշաճ չի կատարում այդ ամենը, դա էլ կարող է լինել լարվածության կամ հակասության առիթ»,- նշեց դատավորը։

Մանրամասները՝ տեսանյութում։