Հավաքի ժամանակ կոչ են արել կախաղան հանել․ վարույթ կա՞ հարուցված․ պատգամավորը՝ փոխնախարարին․ ՏԵՍԱՆՅՈՒԹ

Հայաստանի կառավարությունն առաջարկում է ՆԳՆ փրկարար ծառայության աշխատակիցների համար ներդնել ատեստավորման համակարգ՝ հետագայում բարձրացնելով նրանց աշխատավարձը: «Փրկարար ծառայության մասին» օրենքում փոփոխություններ կատարելու օրենքի նախագիծն Ազգային ժողովի պաշտպանության և անվտանգության հանձնաժողովի նիստում ներկայացրեց ներքին գործերի նախարարի տեղակալ Արփինե Սարգսյանը:

Ատեստավորման համակարգն արդեն ներդրվել է զինված ուժերում և ոստիկանությունում։ Քննարկվում են այդ համակարգին ազգային անվտանգության ծառայությունը միացնելու ծրագրերը։

«Վերջերս Ազգային ժողովի դիմաց ինչ-որ հավաք էր իրականացվում ընդդիմության կողմից հովանավորվող մի հասարակական կազմակերպության կողմից, և այդ հավաքի ժամանակ հնչում էին բռնության կոչեր, անգամ մահվան սպառնալիքներ․ կախաղան հանելու մասին է խոսքը»,- դիմելով ՆԳ փոխնախարարին՝ այս մասին նշեց «Քաղաքացիական պայմանագիր» խմբակցության պատգամավոր վահագն Ալեքսանյանը և հետաքրքրվեց, թե արդյոք արդեն կա հարուցված վարույթ այս գործով․ ինչ գործողություններ են ձեռնարկվում։

ՆԳ փոխնախարարը պատասխանեց, որ բռնության ցանկացած կոչ, աղաղակումներ միանշանակ անթույլատրելի են, և ՆԳՆ ոստիկանության հիմնական խնդիրը հավաքի ժամանակ հասարակական կարգն ապահովելն է։

«Այդ միջադեպի ժամանակ մեր ծառայողները եղել են տեղում և պատշաճ իրականացրել են իրենց գործառույթները։ Իսկ վարույթ հարուցելու լիազորություն մենք չունենք, կարծում եմ՝ Գլխավոր դատախազության գործընկերները հետևել են պրոցեսին և համապատասխան հատկանիշների առկայության պարագայում գուցե հարուցված է քրեական վարույթ, այդ մասին տեղեկություն չունեմ»,- նշեց Սարգսյանը։

Մանրամասները՝ տեսանյութում։