09.09.2026 | 12:34
Առաջիկայում հնարավոր է գլխավոր դատախազը գա ԱԺ՝ Ծովինար Վարդանյանին մեղադրյալ ներգրավելու հարցով․ Էդգար Ղազարյան․ ՏԵՍԱՆՅՈւԹ
Մոսկվայի կոշտ զգուշացումը Երևանին․Պուտինի ձերբակալման հեռանկարը. ՏԵՍԱՆՅՈւԹ
Քաղաքականություն
28.03.2023 | 20:10
Պաշտոնական Մոսկվան բացարձակ անընդունելի է համարում Միջազգային քրեական դատարանի Հռոմի կանոնադրությանը միանալու՝ Երևանի մտադրությունը։ Ռազմավարական դաշնակից համարվող Ռուսաստանից զգուշացնում են՝ երկկողմ հարաբերությունների համար դա չափազանց բացասական հետևանքներ կունենա։
Ռուսաստանի արտգործնախարարության աղբյուրը ՏԱՍՍ պետական գործակալությանը հայտնել է, որ Մոսկվան բացարձակապես անընդունելի է համարում պաշտոնական Երևանի՝ Միջազգային քրեական դատարանի Հռոմի ստատուտին միանալու ծրագրերը՝ Ռուսաստանի ղեկավարության դեմ միջազգային քրեական դատարանի վերջին օրդերների ֆոնին։ ՌԴ նախագահ Վլադիմիր Պուտինին ձերբակալելու միջազգային օրդեր տվել էր հենց այդ դատարանը։
ԱԺ «Հայաստան» խմբակցության պատգամավոր Գեղամ Մանուկյանն ասում է՝ Ռուսաստանի այս կոշտ արձագանքը սպասելի էր, իսկ հետևանքները, ըստ ընդդիմադիր պատգամավորի, կրելու են Հայաստանն ու Արցախը։
1998 թվականին ստորագրված, բայց այդպես էլ չվավերացված Միջազգային քրեական դատարանի Հռոմի կանոնադրությունը հաստատելու համար Կառավարությունն ամիսներ առաջ դիմել էր Սահմանադրական դատարան։ Ըստ գործադիրի՝ դա Ադրբեջանին ռազմական հանցագործությունների համար պատասխանատվության կանչելու հնարավորություն է։
Անցած ուրբաթ Սահմանադրական դատարանը որոշեց՝ Հայաստանի միացումը Միջազգային քրեական դատարանի Հռոմի կանոնադրությանը համապատասխանում է երկրի հիմնական օրենքին։
Հայաստանի ԱԳ նախարարություն գրավոր հարցում ենք ուղարկել՝ խնդրելով պարզաբանել՝ արդյո՞ք Ռուսաստանի ԱԳՆ-ից այս առնչությամբ որևէ դժգոհություն ստացել են, և ի՞նչ բացասական հետևանքների մասին է խոսքը։ Այս գործընթացից ռուսական կողմի դժգոհությունը, ըստ ընդդիմադիր պատգամավորի, փոխանցվել է Ռուսաստանում Հայաստանի դեսպանին։
ՌԴ-ում Հայաստանի դեսպանության ֆեյսբուքյան էջից տեղեկանում ենք, որ երեկ դեսպան Վաղարշակ Հարությունյանը հանդիպել է ՌԴ փոխարտգործնախարար Գալուզինին։ Հաղորդագրության մեջ առանց հստակությունների նշված է, որ քննարկվել են երկկողմ օրակարգի առանձին հարցեր։
Ռուսական կողմի դժգոհությունների վերաբերյալ ԱԺ «Քաղաքացիական պայմանագիր» խմբակցության անդամ Գագիկ Մելքոնյանն ասում է՝ ռուսական կողմը պետք է համակերպվի մտքի հետ, որ Հայաստանն իր վասալը չէ։ Ավելին, ըստ իշխանական պատգամավորի, եթե Ազգային ժողովը վավերացնի Հռոմի կանոնադրությունը, և Պուտինը ժամանի Հայաստան, ապա պետք է ձերբակալվի։
Մինչ ընդդիմադիր պատգամավոր Գեղամ Մանուկյանը պնդում է, թե իշխանությունը ռուսական կողմի կոշտ արձագանքի ֆոնին հարցի քննարկումը կհետաձգի, իշխանական Գագիկ Մելքոնյանն ասում է՝ խմբակցությունը հարցը դեռ չի քննարկել։
Մանրամասները՝ տեսանյութում։
Շողիկ Գալստյան
