05.11.2024 | 17:39
«Դիմակայունություն Սյունիք» ծրագրով մարզին 49 մլն եվրո պետք է հատկացվի․ Ռոբերտ Ղուկասյան․ ՏԵՍԱՆՅՈՒԹ
Ուկրաինան պատրաստվում է հակահարձակման. Ալեքսեյ Ռեզնիկով
Քաղաքականություն
24.02.2023 | 14:16
Ուկրաինան քրտնաջան աշխատում է ապագա հակահարձակման նախապատրաստման ուղղությամբ։ Այս մասին հայտարարել է պաշտպանության նախարար Ալեքսեյ Ռեզնիկովը՝ Ռուսաստանի լայնամասշտաբ ներխուժման տարելիցի կապակցությամբ, գրում է Korrespondent-ը։
ՊՆ ղեկավարը շնորհակալություն է հայտնել Ուկրաինայի պաշտպանության ուժերին՝ ասելով, որ նրանք արել են անհնարինը։
«Դուք հետ շպրտեցիք թշնամու բանակը, որը սարսափեցնում էր ամբողջ աշխարհին, բայց պարզվեց, որ անզոր է ուկրաինացիների դեմ, ովքեր պաշտպանում են իրենց տունն ու հարազատներին՝ պայքարելով իրենց հողի համար»,- գրել է նա ֆեյսբուքյան իր էջում։
Ռեզնիկովն ընդգծել է, որ Ուկրաինան այժմ թևակոխում է «նոր շրջան՝ նոր առաջադրանքով․ հաղթել»՝ նշելով, որ հաղթանակ ասելով՝ նկատի ունի բոլոր տարածքների ազատագրումը մինչև 1991 թվականն առկա սահմանները և վտանգի վերացումը Ռուսաստանի Դաշնության կողմից։
«Հաղթանակ՝ երբ Ուկրաինան կլինի ինքնիշխան և անկախ միջազգայնորեն ճանաչված սահմաններում: Հաջողակ, հարուստ, ուժեղ: Բայց Ռուսաստանն իր ներկայիս տեսքով չի լինի»,- ընդգծել է Ուկրաինայի պաշտպանության նախարարը:
Նախարարն ասել է, որ Ուկրաինան սպասում է ավելի շատ զինատեսակների, այդ թվում՝ ուկրաինական, տանկերի և զրահատեխնիկայի, գործընկերների մասնակցությամբ կլինեն զինվորականների պատրաստման նոր ծրագրեր, տեխնոլոգիայի շնորհիվ կլինի պաշտպանության նոր որակ։
«Լինելու է մեր հակահարձակումը: Մենք քրտնաջան աշխատում ենք այն նախապատրաստելու ուղղությամբ: Մի քանի օրից Ուկրաինան կդիմավորի այն գարունը, որը Կրեմլը ցանկանում էր գողանալ մեզանից: Մենք չենք սառել, մենք կոփվել ենք: Մենք չենք վախեցել խավարից, քայլ առ քայլ մենք կգնանք հաղթանակի»,- շեշտել է Ռեզնիկովը։
Տաթև Ֆռանգյան
