Տոկաևը կշարունակի պաշտոնավարել․ հայտնի են Ղազախստանի նախագահական ընտրությունների նախնական արդյունքները

Ղազախստանի գործող նախագահ Կասիմ-Ժոմարտ Տոկաևը կիրակի օրը կայացած նախագահական ընտրություններում ստացել է ձայների 81,31 տոկոսը։ Այս մասին ճեպազրույցի ժամանակ հայտարարել է Ղազախստանի Կենտրոնական ընտրական հանձնաժողովի ղեկավար Նուրլան Աբդիրովը, փոխանցում է BBC-ի ռուսական ծառայությունը։

Նախնական տվյալներով՝ ընտրություններին մասնակցությունը կազմել է 69,44 տոկոս։ Գրեթե 12 միլիոն գրանցված ընտրողներից քվեարկությանը մասնակցել է ավելի քան 8,2 միլիոնը, հաղորդում է ԿԸՀ-ն։

Ֆերմերների ասոցիացիայի ղեկավար Ժիգուլի Դաիրաբաևը հավաքել է ձայների 3,42 տոկոսը, հասարակական գործիչ Կարակաթ Աբդենը՝ 2,6 տոկոսը, տնտեսագետ Մեյրամ Կաժիկենը՝ 2,53 տոկոսը։

Տոկաևի մրցակիցները նախկինում երբեք չեն եղել մեծ քաղաքականության մեջ և իրենց թեկնածության առաջադրման մասին հայտարարել են ընտրություններից ընդամենը երկու ամիս առաջ։

Վերլուծաբանները կարծում են, որ Տոկաևը արտահերթ ընտրություններ է հրավիրել՝ իր հաղթանակն ապահովելու համար, նախքան իրական հակառակորդների ի հայտ գալը կամ երկրում բողոքի ցույցերի աճը: Հիշեցնենք՝ Տոկաևը Ղազախստանի նախագահ էր դարձել 2019 թ-ին,  28 տարի երկիրը ղեկավարած Նուրսուլթան Նազարբաևը արտահերթ ընտրություններում աջակցել է Տոկաևին և փաստացի իշխանությունը փոխանցել նրան։ Ուստի շատերը Տոկաևին համարում էին միայն Նազարբաևի հովանավորյալ և հավատարիմ աջակից։

Սակայն 2022 թվականի հունվարին տեղի ունեցած բողոքի ցույցերից հետո, երբ անկարգությունների հետևանքով զոհվեց առնվազն 225 մարդ, նոր նախագահը սկսեց ակտիվորեն հեռացնել նախկին առաջնորդի հարազատներին տարբեր գերատեսչությունների առանցքային պաշտոններից, այդ թվում՝ հատուկ ծառայություններում և պետությանը պատկանող ընկերություններից։

Տաթև Ֆռանգյան