31.10.2026 | 17:23
Երևանում բացվել է «ՀայՓաս»-ի երկրորդ գրասենյակը
Զապորոժիեի ԱԷԿ-ը հրետակոծությունից հետո ամբողջությամբ անջատվել է․ «Էներգոատոմ»
Քաղաքականություն
03.11.2022 | 14:17
ՌԴ Զինված ուժերի ստորաբաժանումների կողմից գիշերային հրետակոծությունից հետո Զապորոժիեի ատոմակայանն ամբողջությամբ հոսանքազրկվել է։ Ուկրաինական «Էներգոատոմ» ընկերությունը հայտնել է, որ հրթիռակոծությունը վնասել է Զապորոժիեի ԱԷԿ-ի վերջին երկու բարձրավոլտ կապի գծերն ուկրաինական էներգահամակարգի հետ։
«Ժամը 23:04-ին կայանն անցել է ամբողջական անջատման։ Միացվել են բոլոր 20 դիզելային գեներատորները»,- նշել են ընկերությունից։
Ըստ «Էներգոատոմի»՝ այժմ Զապորոժիեի ԱԷԿ-ում սեփական կարիքների համար էներգիա ապահովելու սխեման օպտիմալացվել է, գործում է ինը դիզելային գեներատոր։ Հինգերորդ և վեցերորդ էներգաբլոկները տեղափոխվում են սառեցման վիճակ։ Սակայն Զապորոժիեի լրիվ անջատման ռեժիմում դիզելային գեներատորների շահագործման համար վառելիքը կբավականացնի 15 օր։
«Հետհաշվարկը սկսվել է։ Սառեցման համակարգի դադարեցման դեպքում ռեակտորների վառելիքի ձողերը սկսում են հալվել»,- զգուշացնում է «Էներգոատոմ»-ը։
Հոկտեմբերի կեսերին ուկրաինական ընկերության ղեկավար Պետր Կոտինը գերմանական ZDF հեռուստաալիքին տված հարցազրույցում ասել էր, որ կայանի միջուկային վթարի հավանականությունը մեծ է, և կարծիք հայտնել, որ էլեկտրաէներգիայի երկարատև անջատումները «կարող են հանգեցնել երկրորդ Ֆուկուսիմայի»։
Տաթև Ֆռանգյան
