25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Ռուսաստանը հիպերձայնային «Կինժալ» հրթիռային համակարգեր է տեղակայել Բելառուսում․ բրիտանական հետախուզություն
Քաղաքականություն
01.11.2022 | 15:36
Ռուսաստանը կարող էր Բելառուսի Մաչուլիշի օդանավակայանում ՄԻԳ-31Կ կործանիչներ ու հիպերձայնային «Կինժալ» հրթիռային համակարգեր տեղակայել։ Այս մասին ասվում է Մեծ Բրիտանիայի ՊՆ հետախուզության զեկույցում, գրում է BBC-ի ռուսական ծառայությունը։
Կործանիչները նկատվել են հոկտեմբերի 17-ին արված արբանյակային լուսանկարներում: Ենթադրյալ ինքնաթիռին մոտ գտնվող պաշտպանիչ հողաթմբում պահվել է մեծ կոնտեյներ: Մասնագետները դա կապում են «Կինժալ» համակարգերի հետ, որը բալիստիկ հրթիռների համակարգ է` հիմնված «Իսկանդեր» բալիստիկ հրթիռի վրա։ Ըստ բրիտանական հետախուզության՝ ՄԻԳ-31Կ-երը հարմարեցված են նման զինամթերք կրելու համար։
Ռուսաստանը «Կինժալ»-ներն օգտագործում է 2018 թվականից և դրանց արձակումներ է արել նաև Ուկրաինայի այս պատերազմի ընթացքում, սակայն այս համալիրը ավելի վաղ Բելառուսում չի օգտագործվել։
Փորձագետները նշում են, որ նման տեղակայումն Ուկրաինայում նոր թիրախների խոցման հնարավորություն է տալիս։ Սակայն, ամենայն հավանականությամբ, ՌԴ-ն այդ զինատեսակը տեղակայել է՝ ազդանշան տալու Արևմուտքին և Բելառուսը ներկայացնելու որպես պատերազմում է՛լ ավելի ներգրավված երկիր։
Էմմա Չոբանյան
