07.10.2026 | 16:20
Հայաստանի Կիոկուշին կարատեի ֆեդերացիան կանցկացնի «Սամուրայ» մրցաշարը
ArmSat-1 արբանյակը դեռ լուսանկարներ չի փոխանցել․ ԲՏԱՆ-ից հայտնում են՝ «թեստավորման փուլում է»
29.10.2022 | 16:31
Բարձր տեխնոլոգիական արդյունաբերության նախարարությունը չի հստակեցնում՝ Հայաստանի առաջին արհեստական արբանյակը տիեզերք արձակվելուց հինգ ամիս անց որևէ լուսանկար փոխանցել է, թե ոչ։
ԲՏԱ նախարար Ռոբերտ Խաչատրյանին ուղղված գրությամբ հետաքրքրվել էինք՝ արբանյակից ստացվե՞լ են լուսանկարներ, եթե ստացվել են, ապա երբվանի՞ց, ի՞նչ պարբերականությամբ, և եթե չեն ստացվել, ապա որո՞նք են պատճառները։
Factor.am-ի գրավոր հարցմանն ի պատասխան Բարձր տեխնոլոգիական արդյունաբերության նախարարությունից նշել են․ «Արբանյակի բոլոր ենթահամակարգերն ու սարքերը, այդ թվում՝ օպտիկական և կապի, առանձին-առանձին հաջողությամբ թեստավորվել են, արդյունքները դրական են։ Թեստավորման գործընթացները տեղի են ունենում ըստ նախատեսված ժամանակացույցի։ Բոլոր աշխատանքների ավարտից հետո տիեզերալուսանկարների ստացումը կկրի կանոնավոր բնույթ»։
Հարցման պատասխանը ստանալուց հետո Factor.am-ը նախարարության մամուլի խոսնակ Լուսինե Մովսիսյանին խնդրեց հստակեցնել՝ լուսանկարներ ստացվե՞լ են, թե՞՝ ոչ։ Նա նշեց, որ գրավոր պատասխանին ավելացնելու նոր տեղեկատվություն չկա։
Նախարարության պատասխանից ենթադրելի է, որ արբանյակը դեռ լուսանկարներ չի ուղարկում, քանի որ գտնվում է տեխնիկական փորձարկումների փուլում։
Բարձր տեխնոլոգիական արդյունաբերության նախարարությունից ավելի վաղ հայտարարել էին, որ արբանյակի անվանումը ArmSat-1 է։ Արբանյակը գործելու է առնվազն չորս տարի։
Նարեկ Կիրակոսյան
