27.07.2026 | 11:45
Լիազորությունները դադարեցված դատավորը վերականգնել է փաստաբանի արտոնագիրը
«Մենք Ուկրաինային մահաբեր զենք չենք մատակարարում». Հարավային Կորեայի նախագահ
Քաղաքականություն
28.10.2022 | 10:56
Հարավային Կորեայի նախագահ Յուն Սուկ Ելը հայտարարել է, որ Սեուլն Ուկրաինային մահաբեր զենք չի տրամադրել՝ մեկնաբանելով ՌԴ նախագահ Վլադիմիր Պուտինի խոսքերն այն մասին, որ նման քայլը կկործանի երկկողմ հարաբերությունները, գրում է BBC-ի ռուսական ծառայությունը։
Հինգշաբթի օրը «Վալդայ» ակումբի հանդիպման ժամանակ Պուտինը պնդել է, որ Հարավային Կորեան, իբր, որոշել է զենք մատակարարել Ուկրաինային և ակնարկել է, որ Սեուլին դուր չի գա, եթե Մոսկվան վերսկսի ռազմական համագործակցությունը ԿԺԴՀ-ի հետ:
«Մենք համերաշխ ենք միջազգային հանրության հետ՝ Ուկրաինային մարդասիրական օգնություն տրամադրելու հարցում և մահաբեր զենք չենք տրամադրել, բայց ամեն դեպքում, դա մեր ինքնիշխանության խնդիրն է», – ասել է Ելը լրագրողներին։
Հարավային Կորեան, լինելով ԱՄՆ-ի դաշնակիցը, միաժամանակ փորձում է խուսափել Ռուսաստանի հետ թշնամանքից Հյուսիսային Կորեայի վրա Մոսկվայի ազդեցության, ինչպես նաև՝ տնտեսական պատճառներով: «Մենք ջանքեր ենք գործադրում խաղաղ և լավ հարաբերություններ պահպանելու աշխարհի բոլոր երկրների, այդ թվում՝ Ռուսաստանի հետ»,- հավելել է Հարավային Կորեայի նախագահը։
Տաթև Ֆռանգյան
