09.10.2026 | 16:48
Կարեն Խաչանովը ծանր հաղթանակով մեկնարկեց Շանհայի «Մասթերսում»
ԱՄՆ-ը կարող է նոր միջուկային ռումբեր տեղակայել Եվրոպայում մինչև տարեվերջ
Քաղաքականություն
27.10.2022 | 16:18
Միացյալ Նահանգները նախատեսում է մինչև այս տարվա վերջ սկսել Եվրոպայում նոր B61-12 կառավարվող միջուկային ռումբերի տեղակայումը։ Այս մասին հայտնում է Politico-ն՝ հղում անելով ամերիկյան դիվանագիտական աղբյուրներին։
Ամերիկացի գիտնականների ֆեդերացիայի տվյալներով՝ ԱՄՆ-ն ավարտել է B61-12 նոր կառավարվող միջուկային ռումբի մշակումը և սկսել դրանց լայնածավալ արտադրությունը։ Նախապես դրանց տեղակայումը Եվրոպայում նախատեսվում էր սկսել 2023 կամ 2024 թվականների վերջին:
Ընդհանուր առմամբ, կարտադրվի 480 նման ռումբ։ Դրանք, մասնավորապես, կփոխարինեն B61-ի հնացած տարբերակին, որից 100 միավորը տեղակայված է Եվրոպայի և Թուրքիայի վեց ավիաբազաներում։
B61-12 օդային ռումբն ունի նույն թողունակությունը, ինչ նախորդ մոդելը՝ 0,3, 1,5, 10 կամ 50 կիլոտոննա։ Նոր ավիառումբի յուրահատկությունը պոչամասում է։ Այն ռումբը դարձնում է կառավարելի և ավելի ճշգրիտ, ինչը հնարավորություն է տալիս ոչ թե պարաշյուտով արձակել այն, այլ լիցք գցել մեծ բարձրության վրա թռչող ինքնաթիռից, որից հետո ռումբն ինքնակառավարմամբ թռչում է շատ կիլոմետրեր, անհրաժեշտության դեպքում՝ դեպի թիրախը:
Օդային ռումբերը կարող են օգտագործվել F-15E, F-16 և Tornado մարտավարական կործանիչ-ռմբակոծիչների կողմից։
Տաթև Ֆռանգյան
