«Ռուսաստանն է միջանցքի խնդիր դրել, որ Ադրբեջանի հետ միջանցք ունենան»․Գագիկ Մելքոնյան․ ՏԵՍԱՆՅՈՒԹ

Ադրբեջանը Հայաստանի տարածքից օկուպացրել էր 40 քառակուսի կմ տարածք, իսկ սեպտեմբերի 13-ին Ջերմուկի դեպքերի ժամանակ այդ տարածքները ավելացել են ևս մոտ 60 քառակուսի կմ-ով: Այս մասին այսօր ԱԺ-ում լրագրողների հետ զրույցում նշեց ԱԺ «Քաղաքացիական պայմանագիր» խմբակցության պատգամավոր, պաշտպանության նախկին փոխնախարար Գագիկ Մելքոնյանը՝ անդրադառնալով դիտարկմանը, որ օրերս «Քաղաքացիական պայմանագիր» պատգամավոր Արմեն Խաչատրյանը հայտարարել էր, թե Ադրբեջանն օկուպացրել է Հայաստանի 127 քառակուսի կմ տարածք:

Գագիկ Մելքոնյանի խոսքով՝ 127 քառակուսի կմ-ն վերաբերում է անցած տարվա մայիսից մինչ օրս տեղի ունեցած օկուպացիաներին։

«Ես 7 օր առաջ եղել եմ արևելյան սահմանին և տեսել եմ, որ մեր դիրքերում արդեն ինժեներական աշխատանքները համարյա կատարված են և մեր զորքը գտնվում է նոր դիրքերում: Առաջնագիծը փոխվել է, նոր առաջնագիծ է ձևավորվել։

Նահանջ չի եղել, իրենք հարձակվել են մեր տարածքների վրա, գրավել են: Այդքան զոհ ենք տվել, չենք նահանջել, մինչև վերջ կռվել ենք, բայց դիրքային կորուստներ ենո ունեցել և առաջնագիծը փոխվել է»,- նշեց Մելքոնյանը:

Անդրադառնալով հարցին, թե եթե սահմանազատում լինի, արդյոք Ադրբեջանը դուրս կգա մեր տարածքներից, կա՞ նման հույս, ՔՊ-ական պատգամավորն արձագանքեց. «Բնական է, որ իրենք նոր հենակետեր են ստեղծում, ամրացնում են: Եթե մի օր էլ մնա մարդը, հիմա էլ ձմեռ է, ցուրտ է, պետք է ստեղծի պայմաններ, որ կարողանա մնալ: Ինչ վերաբերում է հետ քաշվելուն, միջազգային դիտորդներ կան, գնալու է սահմանազատման, սահմանագծման աշխատանքներ, նաև խաղաղության պայմանագիր է կնքվելու: Այդ բոլորը մեր ձեռքը չէ, խոշոր տերությունների ձեռքն է, որ մեզ ձեռք են մեկնել: Մենք պետք է այդ ձեռքը բռնենք: Մենք այդ ձեռքը բռնելո՞ւ ենք, թե՞ չենք բռնելու»:

Գագիկ Մելքոնյանի խոսքով՝ 32 տարի սահմաններին կրակոցներ կան և լինելու են, մինչև մենք մեր խնդիրները չլուծենք, սահմանազատման սահմաագծման հարցը չլուծենք»:

Մանրամասները՝ տեսանյութում։