Ի՞նչ պետք է անի պաշտոնյան, որը կտավ է նվեր ստացել և պարզվել է՝ Այվազովսկի է․ Բագրատյանը՝ փոխնախարարին․ ՏԵՍԱՆՅՈՒԹ

Ազգային ժողովը քննարկում  է «Հանրային ծառայության մասին» օրենքում և հարակից օրենքներում փոփոխություններ և լրացումներ կատարելու մասին օրենքների նախագծերի փաթեթն առաջին ընթերցմամբ ընդունելու մասին  հարցը:

ՀՀ արդարադատության նախարարի տեղակալ Արփինե Սարգսյանի խոսքով՝ նախագծի ընդունումը բխում է Հայաստանի միջազգային պարտավորություններից:

Նա նշեց, որ Եվրոպայի խորհրդի Կոռուպցիայի դեմ պայքարող պետությունների խմբի զեկույցների շրջանում վերհանվել են մի շարք խնդիրներ: Անբավարար է գնահատվել ՀՀ-ում նվերները բացահայտելու վերաբերյալ գործիքակազմը:

«Վարչական իրավախախտումների վերաբերյալ օրենսգրքով նախատեսվել է առանձին հոդված՝ ուղղված նվերներ ընդունելու կամ հաշվառելու սահմանած կարգը խախտելու դեպքում պատասխանատվություն նախատեսելուն»,- ասաց փոխնախարարը:

«Ի՞նչ պետք է անի պաշտոնյան, որը կտավ է նվեր ստացել և պարզվել է՝ Այվազովսկի է»,- պատգամավոր Սերգեյ Բագրատյանն այս հարցն ուղղեց փոխնախարարին։

«Ոչ թե ցանկացած նվերն է հաշվառվելու, այլ միայն պաշտոնեական պարտականությունները կատարելու հետ կապված ստացած նվերները։ Նախատեսվում է, որ 40 հազար դրամը չգերազանցող արժողությամբ թույլատրելի նվերները ենթակա չեն հաշվառման՝ բացառությամբ 6 ամսվա ընթացքում նույն աղբյուրից ստացված պարբերական բնութ կրող՝ 5 և ավելի նվերները։

Այս պահի դրությամբ գործող Հանրային ծառայության մասին օրենքով նախատեսվում է, որ 60 հազար դրամը գերազանցող նվեր չի կարող ընդունել պաշտոնատար անձը»։

Սերգեյ Բագրատյանը կարծիք հայտնեց, որ ավելի ճիշտ կլինի, որ ընդհանրապես արգելվի, որ պետական պաշտոնատար անձը նվեր ընդունի։

Մանրամասները՝ տեսանյութում։