Երևանում երկու նոր դատարան կձևավորվի՝ քրեական և քաղաքացիական. Տիգրան Դադունց․ ՏԵՍԱՆՅՈՒԹ

Երևան քաղաքի առաջին ատյանի ընդհանուր իրավասության դատարանի փոխարեն կգործի երկու նոր դատարան՝ Երևան քաղաքի քրեական և քաղաքացիական դատարանները: Այսօր հրավիրված ասուլիսում ՀՀ արդարադատության նախարարության «Օրենսդրության զարգացման կենտրոն» հիմնադրամի տնօրեն Տիգրան Դադունցը նշեց, որ նման նախաձեռնությունը պայմանավորված է Երևան քաղաքի առաջին ատյանի ընդհանուր իրավասության դատարանի գերծանրաբեռնվածությամբ:

«Դատարանների ծանրաբեռնվածության մասին վկայում է տարեցտարի աճող դատական գործերի թիվը: Դատարաններում անձանց դատական իրավունքի պաշտպանությունը սովորաբար չի իրականացվում այն ժամկետներում, որոնք քաղաքացիներն ակնկալում են: Այստեղ ունենք ողջամիտ ժամկետի պահպանման խնդիր»,-ասաց Տիգրան Դադունցը:

Նախնական տվյալներով՝ Երևան քաղաքի քաղաքացիական գործերով դատարանը կգործի առնվազն 35 դատավորի թվակազմով, իսկ քրեականը՝ 30:

«Ինչո՞ւ եմ ասում «առնվազն»: Այո, որովհետեւ Դատական ​​օրենսգիրքը նվազագույն շեմ է սահմանել։ Կառավարությունը կարող է իր համաձայնությունը տալ Բարձրագույն դատական ​​խորհրդին, իսկ նա իր հերթին կարող է բարձրացնել վերը նշված ցուցանիշը»,-պարզաբանեց Դադունցը՝ հավելելով, որ դատավորների թիվը, անհրաժեշտության դեպքում, կարող է զգալիորեն ավելացվել։

Նախագիծն անցել է հանրային քննարկման փուլ, ներկայում լրամշակվում է: Առաջիկայում այն կներկայացվի Կառավարություն, որից հետո՝ խորհրդարան:

Տիգրան Դադունցը տեղեկացրեց, որ գործնականում երկու դատարաններ ունենալու գործընթացը ցնցումներ չի ենթադրում: Խորհրդարանում ընդունվելուց հետո առավելագույնը մեկ ամսվա ընթացքում բոլոր տեխնիկական հարցերը կկարգավորվեն:

Մանրամասները՝ տեսանյութում։