15.09.2026 | 10:25
Սևանում ապամոնտաժվել է Ռուբեն Հայրապետյանի առանձնատան՝ ապօրինի կառուցված պարիսպը․ ՏԵՍԱՆՅՈՒԹ
Աթենքն Անկարային մեղադրել է «92 մերկ ու կապտած» միգրանտների սահմանային գետով ուժով Հունաստան մղելու համար
Քաղաքականություն
17.10.2022 | 16:41
Աթենքը հայտարարել է, որ 92 միգրանտների՝ «մերկ ու կապտած», բռնի ուժով Թուրքիայից Հունաստան են տեղափոխել Եվրոս գետով։ Այս մասին գրում է AFP-ը, որիվ վկայակոչում է Turkish Minute-ը։
ԵՄ սահմանային Frontex գործակալությունը AFP-ի թղթակցի հետ զրույցում հաստատել է միգրանտների խմբի ժամանումը այնպիսի պայմաններում, որոնք, Հունաստանի քաղաքացիական պաշտպանության նախարարության տեղեկացմամբ, «անմարդկային» են եղել։
«Frontex-ի սպաները հայտնել են, որ միգրանտներին գտել են գրեթե մերկ, իսկ որոշներին՝ նկատելի վնասվածքներով»,- ասել է կազմակերպության մամուլի քարտուղար Պաուլինա Բակուլան։
ՄԱԿ-ի փախստականների հարցերով կազմակերպությունն էլ նշել է, որ «խորապես վշտացած է 92 մարդու ցնցող հաղորդումներով և պատկերներով, որոնք, ըստ տեղեկությունների, հայտնաբերվել են թուրք-հունական ցամաքային սահմանին մերկ վիճակում»։
Բակուլան ասել է, որ Frontex-ի սպաներն աշխատել են Հունաստանի իշխանությունների հետ՝ միգրանտներին (հիմնականում՝ աֆղաններ և սիրիացիներ) անհապաղ օգնություն ցուցաբերելու համար: Նա նշել է, որ կազմակերպությունը տեղեկացրել է իրավունքների հնարավոր խախտման մասին:
Հունաստանի քաղաքացիական պաշտպանության նախարար Թակիս Թեոդորիկակոսը մեղադրել է Թուրքիային «անօրինական ներգաղթը գործիքավորելու» համար՝ հարևանների միջև միգրացիայի վերաբերյալ վերջին մեղադրանքների շարքում: Նա նշել է, որ միգրատները պատմել են, թե ինչպես են թուրքական բանակի երեք մեքենաներով իրենց տեղափոխել գետաբերան, որը բնական սահման է երկու երկրների միջև։
Թուրքիայի նախագահականը հերքել է այս մեղադրանքները։
«Մենք հորդորում ենք Հունաստանին՝ հնարավորինս շուտ հրաժարվել փախստականների նկատմամբ կոշտ վերաբերմունքից, դադարեցնել Թուրքիային ուղղված անհիմն և կեղծ մեղադրանքները»,- թվիթերում գրել է Թուրքիայի նախագահականի հաղորդակցության գրասենյակի տնօրեն Ֆահրեթթին Ալթունը։
Թուրքիայի ներքին գործերի փոխնախարար Իսմայիլ Չաթաքլըն կոչ է արել Հունաստանին դադարեցնել այն, ինչ ինքն անվանել է «մանիպուլյացիա և անազնվություն»։
Հունաստանի միգրացիայի նախարար Նոտիս Միտարաչին էլ միջադեպը որակել է որպես «ամոթ քաղաքակրթության» համար։
Էմմա Չոբանյան
