06.11.2024 | 10:33
Հանրապետականները ձայների մեծամասնություն են ստացել ԱՄՆ Սենատում․ Reuters
Ռուսաստանի հաղթանակը կլինի ՆԱՏՕ-ի պարտությունը․ Ստոլտենբերգ
Քաղաքականություն
11.10.2022 | 20:25
ՆԱՏՕ-ի գլխավոր քարտուղար Յենս Ստոլտենբերգը կարծում է, որ Ուկրաինայի դեմ պատերազմում Ռուսաստանի հաղթանակը կլինի հենց Հյուսիսատլանտյան դաշինքի պարտությունը, ուստի նման արդյունք չի կարելի թույլ տալ։ Այս մասին նա հայտարարել է հոկտեմբերի 11-ին Բրյուսելում կայացած ճեպազրույցում, գրում է Korrespondent-ը։
ՆԱՏՕ-ի գլխավոր քարտուղարի խոսքով՝ բարբարոսական գնդակոծությունները, որ Ռուսաստանն իրականացրել է Ուկրաինայի խաղաղ բնակչության դեմ, վկայում են ռազմի դաշտում ռուսական բանակի անզորության, ինչպես նաև այն մասին, որ Ռուսաստանի Դաշնությունը չի կարողանա հաղթել այս պատերազմում։
«Ուկրաինայի պատերազմում Ռուսաստանի հաղթանակը պարտություն կլինի ՆԱՏՕ-ի համար։ Դա չի կարելի թույլ տալ։ Այդ իսկ պատճառով Հյուսիսատլանտյան դաշինքը նախատեսում է մեծացնել և պահպանել Ուկրաինային աջակցությունը, որպեսզի նա կարողանա շարունակել պաշտպանել իրեն և ազատագրել տարածքները ռուսական օկուպացիայից։ Ուկրաինան թափ է հավաքել և շարունակում է զգալի առաջընթաց գրանցել այն ժամանակ, երբ Ռուսաստանն ավելի ու ավելի է կիրառում սարսափելի անկանոն հարձակումներ խաղաղ բնակչության և ավելի կարևոր ենթակառուցվածքների վրա»,- ասել է Ստոլտենբերգը։
Նրա խոսքով՝ հոկտեմբերի 10-ին Ուկրաինայի դեմ իրականացված հրթիռային հարձակումները ոչ այլ ինչ են, քան թուլության նշան։
«Ռուսաստանը պարտվում է մարտի դաշտում։ Քանի որ Մոսկվան հնարավորություն չունի կասեցնելու ուկրաինական ուժերի առաջխաղացումը, նրանք կարող են պատասխանել միայն ուկրաինական քաղաքների վրա նման հարձակումներով»,- ասել է ՆԱՏՕ-ի գլխավոր քարտուղարը։
ՆԱՏՕ-ն նաև շուտով կանցկացնի միջուկային զսպման ուժերի պլանավորված վարժանքներ։ Դրանք պետք է օգնեն կանխել Ռուսաստանի կողմից հնարավոր էսկալացիան։
Տաթև Ֆռանգյան
