ՄԱԿ-ի Գլխավոր վեհաժողովը կքվեարկի Ուկրաինայում ՌԴ-ի գործողությունները դատապարտող բանաձևի շուրջ

Ուկրաինան կոչ է արել միջազգային հանրությանը դատապարտել մահացու հրթիռային հարձակումները մայրաքաղաք Կիևի և մի շարք այլ քաղաքների ուղղությամբ և մերժել Մոսկվայի փորձը՝ միացնելու երկրի արևելյան ու հարավային չորս շրջանները, գրում է VOA-ն։

«Ռուսական պատվիրակության հետևից արյան հետքեր են ձգվում, երբ նա մտնում է Գլխավոր վեհաժողով, և այս դահլիճը լցվում է մխացող մարդկային մարմնի հոտով»,- ասել է ՄԱԿ-ում Ուկրաինայի դեսպան Սերգեյ Կիսլիցան՝ ելույթ ունենալով ՄԱԿ-ի Գլխավոր վեհաժողովի հատուկ նիստում։

Կիսլիցան ասել է, որ Ուկրաինայի վրա արձակվել է առնվազն 84 հրթիռ և երկու տասնյակ անօդաչու թռչող սարք՝ թողնելով մահվան և ավերածությունների հետքեր:

«Թիրախները ներառում էին էներգետիկ օբյեկտներ, բնակելի շենքեր, դպրոցներ և համալսարաններ, թանգարաններ և քաղաքի կենտրոնական խաչմերուկներ։ Ամբողջ աշխարհը ևս մեկ անգամ տեսավ ահաբեկչական պետության իրական դեմքը, որը սպանում է մեր ժողովրդին»,- ասել է նա:

Արտակարգ խորհրդակցություն է հրավիրվել՝ քննարկելու Ռուսաստանի անցկացրած, այսպես կոչված, «հանրաքվեները» և Ուկրաինայի Դոնեցկի, Լուգանսկի, Խերսոնի և Զապորոժիեի շրջանները միացնելու փորձերը։ Բայց դրանք մթագնվում են օդային հարվածներով, որոնք հասցվել են Ուկրաինայի քաղաքներին, այդ թվում՝ մայրաքաղաք Կիևին, որտեղ հունիսից ամեն ինչ հանգիստ էր:

Ելույթ ունեցող 20 երկրներից բոլորը՝ բացի Ռուսաստանը, քննադատել են վերջին գրոհները, ընդ որում՝ որոշները նշում են, որ դրանք կարելի է հավասարեցնել ռազմական հանցագործությունների։ Մոսկվայի ներկայացուցիչը հայտարարել է, որ երկուշաբթի հասցված հարվածները պատասխան են եղել շաբաթ Ղրիմը Ռուսաստանի հետ կապող կամրջի վրա տեղի ունեցած պայթյունին:

«Մենք զգուշացրել ենք, որ սա և նման բաներն անհետևանք չեն մնա։ Կատարելով նման դիվերսիաներ, կազմակերպելով ահաբեկչություն և սպանելով նրանց չսիրած պաշտոնյաներին ու քաղաքական գործիչներին՝ Կիևի վարչակարգն իրեն «հավասարեցրել է» միջազգային ամենաօդիոզ ահաբեկչական կազմակերպություններին»,- ասել է Վասիլի Նեբենզյան:

Ուկրաինան համոզիչ կերպով ակնարկել է, որ կամրջի վրա բեռնատարի պայթյունն իրականացրել են իր հատուկ ծառայությունները, սակայն հրապարակավ պատասխանատվություն չի ստանձնել։

Գլխավոր վեհաժողովում քննարկումները կվերսկսվեն չորեքշաբթի։ Խոսք են խնդրել ևս 45 երկրներ, այդ թվում՝ Ռուսաստանի մի քանի դաշնակիցներ՝ Բելառուսը, Հյուսիսային Կորեան և Սիրիան: BRICS դաշինքում Ռուսաստանի բարեկամներից (Բրազիլիա, Ռուսաստան, Հնդկաստան, Չինաստան, Հարավային Աֆրիկա) միայն Չինաստանն է հստակեցրել, որ ցանկանում է ելույթ ունենալ վեհաժողովում:

Բանավեճի ավարտին ելույթ կունենա ԱՄՆ-ը։ Երկուշաբթի կայացած հանդիպումից առաջ ԱՄՆ պետքարտուղար Էնթոնի Բլինքենն ասել է, որ ոչ մի սկզբունքային երկիր չի կարող անտարբեր լինել այն սարսափների նկատմամբ, որ իրականացնում է Ռուսաստանն Ուկրաինայում։

Տաթև Ֆռանգյան