Փաշինյանը մեկնել է Ալիևի և Էրդողանի հետ հանդիպելու․ Սամվել Բաբայանը հավաք է կազմակերպել․ Լուրեր

1. Գիշերը ժամը 22:00-ի դրությամբ իրավիճակը հայ-ադրբեջանական սահմանին հարաբերականորեն կայուն է եղել, հայտնել են ՀՀ ՊՆ-ից։ Մինչ այդ, երեկյան ժամը 19:40-20:00-ն, Ադրբեջանի ԶՈւ ստորաբաժանումները, ականանետերի և խոշոր տրամաչափի հրաձգային զինատեսակների կիրառմամբ, կրակ են բացել հայ-ադրբեջանական սահմանի արևելյան հատվածում տեղակայված հայկական մարտական դիրքերի ուղղությամբ: Մոտ կես ժամ անց հակառակորդի կրակը լռեցվել է:
2. Վարչապետ Նիկոլ Փաշինյանը մեկնել է Պրահա, որտեղ տեղի է ունենալու Փաշինյանի, Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի ղեկավար Իլհամ Ալիևի քառակողմ հանդիպումը: Նույն օրը Պրահայում նախատեսված է նաև Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը։
3. Հյուսիս-հարավ ճանապարհային միջանցքի Տրանշ-3-ի Թալին-Լանջիկ (18.7կմ) հատվածում ասֆալտապատումն ավարտվել է։ «Ճանապարհային դեպարտամենտ» հիմնադրամից հայտնում են, որ այս պահին ընթանում են ճանապարհի կահավորման՝ անվտանգության տարրերի տեղադրման աշխատանքներ։ Մինչև ընթացիկ տարվա վերջ Թալին-Լանջիկ հատվածի վերակառուցումը կավարտվի։
4. Հայաստանի խորհրդարանը դիմել է կառավարությանը՝ 31 մլն դրամ տրամադրելու համար։ ԱԺ աշխատակազմում համարում են, որ խորհրդարանի ճաշարանը անհապաղ վերանորոգման կարիք ունի, մասնավորապես պետք է օդափոխության համակարգը տեղադրել, որպեսզի ճաշարանի հոտերը դուրս գան տարածքից։

Այս ժամի լուրերը՝ տեսանյութում։