Լարվածության թուլացման որոշակի հնարավորություններ ենք տեսնում․ Փաշինյան․ ՏԵՍԱՆՅՈՒԹ

ԱԺ – Կառավարություն հարցուպատասխանի ժամանակ ԱԺ «Քաղաքացիական պայմանագիր» խմբակցության պատգամավոր Մարիամ Պողոսյանը ՀՀ վարչապետ Նիկոլ Փաշինյանին հարց ուղղեց Հայաստանի շուրջ ստեղծված իրավիճակի և խաղաղության օրակարգի շուրջ ընթացող բանակցային գործընթացի մասին:

«Ընդհանուր առմամբ, ՀՀ շուրջ իրադրությունը, կարծում եմ՝ շարունակում է մնալ բավականին լարված, կայուն լարված, բայց պիտի ասեմ նաև, որ, կարծում եմ, նաև ՊՆ-ի հաղորդագրություններից նկատելի է, որ լարվածության թուլացման որոշակի հնարավորություններ մենք տեսնում ենք, բայց պետք է ընդգծել, որ այդ իմաստով հնարավորություն տեսնում ենք՝ նաև բանակցային գործընթացի բովանդակությունից ելնելով:

Դուք տեղյակ եք, որ վերջին 10 օրվա ընթացքում տեղի են ունեցել մի շարք հանդիպումներ, մասնավորապես Միրզոյան-Բլինքեն-Բայրամով ֆորմատով, տեղի է ունեցել նաև ԱՄՆ-ի նախագահի անվտանգության գծով խորհրդական Ջեյք Սալիվանի, ՀՀ ԱԽ քարտուղարի և Ադրբեջանի նախագահի օգնականի հանդիպումը, և նաև նախորդ օրը տեղի ունեցավ Միրզոյան-Բայրամով հանդիպումը, երեկ տեղի ունեցավ Բլինքեն-Բայրամով-Միրզոյան եռակողմ հեռախոսազանգը:

Իհարկե, այդ խոսակցությունները պարզ և հեշտ խոսակցություններ չեն, բայց պիտի ասեմ, որ մեր վերլուծությամբ և իմ գնահատմամբ՝ վերջին շրջանի քննարկումները և դիվանագիտական աշխատանքը մեր առաջ գնալու որոշակի տարածք են ստեղծել, և այս առումով ես ուզում եմ հետևյալ գնահատականը տալ, թե ինչ ուղղություններով կարող է որոշակի տարածք առաջանալ, որպեսզի մենք շարժվենք առաջ: Ըստ էության, 1991 թվականի դեկտեմբերի 8-ի համաձայնագրի հիման վրա Հայաստանի և Ադրբեջանի կողմից փոխադարձաբար տարածքային ամբողջականությունը ճանաչելու կոնցեպտի մասին է. կան նախանշաններ, որ այս հենքը և այս մոտեցումը կարող են փոխադարձաբար ընդունելի լինել կողմերի համար:

Հաջորդը՝ ես կարծում եմ, որ կա որոշակի տարածք, որպեսզի տեղի ունենա և մեկնարկի խոսակցություն ԼՂ-ի և Ադրբեջանի միջև, իսկ այս երկու ուղղությունները ես համարում եմ անկյունաքարային նշանակություն ունեցող, նաև պիտի արձանագրեմ, որ մենք, ըստ էության, այս փուլում բավարարված ենք միջազգային արձագանքով սեպտեմբերի 13-ին տեղի ունեցած իրադարձությունների վերաբերյալ:

Պետք է շարունակենք մեր աշխատանքը, որպեսզի միջազգային աշխատանքը լինի հետևողական, բայց պարզ է, որ ամբողջ միջազգային հանրությունը հասցեական գնահատական և հասցեական մոտավոր ճանապարհային քարտեզի նախագիծ է տալիս, թե ինչպես պիտի լուծենք այս խնդիրը, ինչպես հաղթահարենք իրավիճակը»,- նշեց Նիկոլ Փաշինյանը:

Մանրամասները՝ տեսանյութում։