Քաղաքականություն
28.09.2022 | 20:02«Ռոբերտ Քոչարյանն այսօր ոչ թե այսօր ասուլիս պիտի տար, այլ իր կալանքը հաշվեր համապատասխան վայրում։ Ես հույս ունեմ, որ այդ օրը մոտ է։ Մասնակի կամ ամբողջական իշխանափոխության իր հնչեցրած մտքերը կապ չունեն ժողովրդի իրական տրամադրությունների հետ։ Թող ձեր նշած անձը և իրեն սատարողները գնան արհավիրքի, ցավի, կսկիծի մեջ ապրող մեր սահմանամերձ բնակավայրերում այս անձի անունը տան, և դրանով հանդերձ՝ իրենք հասկանան, թե ինչո՞ւ մարդիկ չեն ուզում նրա վերադարձը։ Նրանից որևէ փրկություն չեն ակնկալում»,- Factor TV-ին տված հարցազրույցում ասում է «Հանուն Հանրապետության» կուսակցության ղեկավար Արման Բաբաջանյանը՝ ի պատասխան Ռոբերտ Քոչարյանի կողմից այսօրվա ասուլիսում հնչեցված գնահատականների։
Երկրորդ նախագահն այսօրվա ասուլիսում, ըստ էության, պատասխանեց Տեր-Պետրոսյանի առաջարկին, ասելով՝ նրա առաջարկը կատեգորիկ անընդունելի է իր համար․ «Ի՞նչ մտքեր են հնչեցվում հիմա․ միավորվենք, որ օգնենք ծանր որոշումների կայացմանը։ Կոնսոլիդացիան իրականացնում են ժողովրդին հաղթանակի մղելու համար, կապիտուլյացիայի համար պետք է դեկոնսոլիդացիա»։
Եվ նա առաջին նախագահին անգամ քննադատեց, թե նրան պետք է, որ անզորության զգացում առաջանա։ Ի դեպ, նա իշխանությանը համեմատեց ուռուցքի հետ, որին պետք է չեզոքացնել․ «Իշխանափոխությունը իմպերատիվ պահանջ է, և սա այն հարցն է, որ կարող է քննարկվել քաղաքական դաշտում։ Եթե ժողովուրդը պատրաստ է պայքարել, դեռ հավանականություն կա այս ամենը կանգնեցնել»։
Կարելի է փաստել՝ նա այս իրավիճակում տեսնում է իշխանափոխության խնդիր, և ո՛չ պրոբլեմի շուրջ կոնսոլիդացիա։ Արման Բաբաջանյանը չի կիսում Քոչարյանի այս մոտեցումը․ «Մարդը չի պատկերացնում, որ ժողովրդի դժվար խնդիրները և օրակարգերը կոնսոլիդացիայի անհրաժեշտություն են ստեղծում, որ նվազ կորուստներով պետությունը հաղթահարի իր խնդիրները և հարատևության շուրջ մենք կարողանանք խոսակցություն ունենալ»։
«Հանուն Հանրապետության» կուսակցության ղեկավարն այսպիսի հարց է բարձրացնում․ «Հիմա կրակոցներ չկան, էսկալացիան, կարծես, առժամանակ սառել է, ո՞ւր են իրենք։ Ֆիքսե՞լ եք, որ իրենք ակտիվանում են, երբ ակտիվանում են ադրբեջանցիները։ Ֆիքսե՞լ եք, որ սահմանային կրակահերթերի և ավերածությունների հետ իրենք հայտնվում են Բաղրամյան պողոտայում և Հանրապետության հրապարակում։ Սրանք պատահականություններ չեն»։
Հարցազրույցն ամբողջությամբ՝ տեսանյութում։
Ռոբերտ Անանյան
