27.02.2026 | 23:15
Իսրայելում ԱՄՆ դեսպանատունը թույլ է տվել իր աշխատակիցներին լքել երկիրը` Իրանին հնարավոր հարվածի ֆոնին
ԱՄՆ Սենատը 430 միլիարդ դոլար է հաստատել գնաճի դեմ պայքարի համար
Քաղաքականություն
08.08.2022 | 14:22
ԱՄՆ Սենատը հավանություն է տվել 434 միլիարդ դոլար արժողությամբ օգնության փաթեթին, որը, ի թիվս այլ բաների, ուղղված է գնաճի դեմ պայքարին: Օրինագծի ընդունման օգտին քվեարկել է 101 սենատորներից 51-ը։ Որոշիչ ձայնը տվել է ԱՄՆ փոխնախագահ Քամալա Հարիսը, գրում է DW-ի ռուսական ծառայությունը։
Հաղորդվում է, որ մոտ 370 միլիարդ դոլար կուղղվի էներգետիկ անվտանգությանը և կլիմայի պաշտպանությանը, ինչպես նաև մի շարք հարկային արտոնություններին: Եվս 64 միլիարդ կհատկացվի առողջապահական նախաձեռնություններին, մասնավորապես՝ դեղերի գների իջեցմանը։ Բացի այդ, օրինագիծը նախատեսում է կորպորացիաների համար հարկային վերահսկողության խստացում:
Սենատի կողմից օրինագծի հաստատումը մեծ հաղթանակ է համարվում ԱՄՆ նախագահ Ջո Բայդենի համար, որը մեկուկես տարի առաջ պաշտոնը ստանձնելիս խոստացել էր խոշոր բարեփոխումներ, սակայն մինչ այժմ չի կարողացել դրանք իրականացնել։ Դեմոկրատներն ակնկալում են, որ օրենքի ընդունումը թույլ կտա նրանց պահպանել մեծամասնությունը Կոնգրեսում այս տարվա ընտրություններում։
Ներկայացուցիչների պալատում քվեարկությունը սպասվում է օգոստոսի 12-ին։ Մինչ այդ, Սպիտակ տան ղեկավարը ողջունել է Սենատի որոշումը։
«Սա պահանջում էր բազմաթիվ փոխզիջումներ: Ներկայացուցիչների պալատը պետք է հնարավորինս շուտ ընդունի օրինագիծը, և ես անհամբեր սպասում եմ, թե երբ կարող եմ ստորագրել այն»,- ասել է Ջո Բայդենը:
Տաթև Ֆռանգյան
