Ջո Բայդենն ու Սի Ցզինպինը քննարկել են իրավիճակը Ուկրաինայում և Թայվանում

ԱՄՆ նախագահ Ջո Բայդենը և Չինաստանի առաջնորդ Սի Ցզինպինը հեռախոսազրույցի ժամանակ քննարկել են Ուկրաինայի պատերազմը և Թայվանի շուրջ ստեղծված իրավիճակը։ Այս մասին հինգշաբթի՝ հուլիսի 28-ի երեկոյան ճեպազրույցում հայտնել է Սպիտակ տան ներկայացուցիչը։
Նշվում է, որ երկու երկրների ղեկավարների ընդհանուր զրույցը տևել է 2 ժամ 20 րոպե։

Նախ, քննարկվել են երկու երկրների միջև համագործակցության հնարավոր ոլորտները՝ հատուկ շեշտադրումով կլիմայի փոփոխության և առողջապահության, ինչպես նաև թմրամիջոցների դեմ պայքարի վրա։

Ղեկավարները կարծիքներ են փոխանակել Ուկրաինայում Ռուսաստանի պատերազմի և դրա համաշխարհային հետևանքների վերաբերյալ:

«Առաջնորդները կարծիքներ են փոխանակել այն մասին, թե ինչպես են զարգանում իրադարձությունները այս պահին հակամարտության գոտում, ինչպես նաև իրենց մտահոգությունների մասին, թե ուր կարող են հասնել իրադարձությունները», – ասել է պաշտոնյան:

ԱՄՆ-ի և Չինաստանի առաջնորդները երկար քննարկել են նաև Թայվանի շուրջ իրավիճակը:

«Թայվանի վերաբերյալ ուղիղ և անկեղծ խոսակցություն է եղել: Նախագահ Բայդենը վերահաստատել է Միացյալ Նահանգների հավատարմությունը մեր «Մեկ Չինաստան» քաղաքականությանը՝ առաջնորդվելով Թայվանի հետ հարաբերությունների մասին օրենքով, երեք համատեղ կոմյունիկեներով և վեց հավաստիացումներով», – ասել է Սպիտակ տան պաշտոնյան:

Ղեկավարները նշել են, որ ԱՄՆ-ը և Չինաստանը տարաձայնություններ ունեն Թայվանի հարցում, սակայն նրանք այդ հարցի շուրջ առնչվում են ավելի քան 40 տարի և պետք է պահպանեն ուղիղ հաղորդակցություն։
Սպիտակ տան ներկայացուցչի խոսքով՝ զրույցը եղել է առարկայական, մանրամասն ու անկեղծ։

Տաթև Ֆռանգյան