19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Թուրքիայի ռազմարդյունաբերության վարչությունը հայտարարել է, որ չի դիտարկում ՌԴ-ի հետ «Բայրաքթար»-ների համատեղ արտադրության հարցը
Քաղաքականություն
29.07.2022 | 13:58
Ռուսաստանի հետ անօդաչու թռչող սարքերի համատեղ արտադրության ոլորտում հնարավոր համագործակցության հարցը Թուրքիայի պաշտպանական արդյունաբերության վարչության կողմից չի քննարկվում։ Այս մասին հայտնում է թուրքական Hürriyet թերթը՝ հղում անելով երկրի պաշտպանական արդյունաբերության վարչության ղեկավար Իսմայիլ Դեմիրին, գրում է ՏԱՍՍ-ը։
«Չեմ կարող ասել, կլինի, թե՞ ոչ։ Մեր օրակարգում նման բան չկա, այդ ուղղությամբ աշխատանքներ չեն տարվում։ Գործընթացը ձևավորվում է Թուրքիայի քաղաքականության շրջանակներում, մենք միայն կատարում ենք աշխատանքները՝ կապված տեխնիկական կողմի հետ»,-ասել է Դեմիրը՝ պատասխանելով համագործակցության հնարավորության մասին հարցին։
Հիշեցնենք, որ թուրքական լրատվամիջոցները տեղեկություններ էին տարածել, որ Էրդողանը բարձրագույն կուսակցական հանդիպման ժամանակ իր գործընկերներին ասել էր, որ Պուտինը դիմել է իրեն Թեհրանում վերջերս կայացած հանդիպման ժամանակ՝ առաջարկելով գործարք կնքել ՌԴ-ում թուրքական «Բայքար» ընկերության հետ հարվածային անօդաչու թռչող սարքեր արտադրելու համար։
Անդրադառնալով այս թեմային՝ ՌԴ նախագահի մամուլի խոսնակ Դմիտրի Պեսկովը չէր հերքել Պուտինի առաջարկի մասին լուրը՝ նշելով, որ երկու երկրների միջև ռազմատեխնիկական համագործակցությունը մշտապես օրակարգում է։ Նա հաստատել էր, որ երկու երկրների նախագահների վերջին շփումների ընթացքում շոշափվել է ռազմատեխնիկական համագործակցության թեման, և հարցը հավանաբար քննարկվելու է նաև Թուրքիայի նախագահ Ռեջեփ Թայիփ Էրդողանի՝ օգոստոսի 5-ին Սոչի կատարելիք այցի ընթացքում։
Էմմա Չոբանյան
