05.02.2026 | 20:53
Հայ վարորդների խնդիրները՝ Սիմոնյան-Մատվիենկո հանդիպման օրակարգում
Մաքուր, առողջ և կայուն շրջակա միջավայրի հասանելիությունը ՄԱԿ-ը հռչակել է որպես մարդու համընդհանուր իրավունք
Քաղաքականություն
29.07.2022 | 11:03
ՄԱԿ-ի Գլխավոր ասամբլեան հինգշաբթի օրն ընդունել է շրջադարձային բանաձև, որը մաքուր, առողջ և կայուն շրջակա միջավայրի հասանելիությունը հռչակում է որպես մարդու համընդհանուր իրավունք: Փաստաթղթին աջակցել է 161 երկիր։ Ութ պետությունների, այդ թվում՝ Ռուսաստանի պատվիրակությունները ձեռնպահ են քվեարկել, ասված է կազմակերպության պաշտոնական կայքէջում։
Գլխավոր ասամբլեայի բանաձևը հիմնված է անցյալ տարի Մարդու իրավունքների խորհրդի կողմից ընդունված տեքստի վրա։ Այն կոչ է անում պետություններին, միջազգային կազմակերպություններին և բիզնեսին ակտիվացնել իրենց ջանքերը՝ մոլորակի բոլոր բնակիչների համար առողջ միջավայր ապահովելու համար։
ՄԱԿ-ի գլխավոր քարտուղար Անտոնիո Գուտերեշը ողջունել է, իր ձևակերպմամբ, պատմական որոշումը։ Նրա կարծիքով՝ այս կարևոր իրադարձությունը ցույց է տալիս, որ անդամ երկրներն ի վիճակի են համախմբվել՝ պայքարելու կլիմայի փոփոխության, կենսաբազմազանության կորստի և շրջակա միջավայրի աղտոտման եռակի ճգնաժամի դեմ։
«Բանաձևը կօգնի փակել շրջակա միջավայրի պաշտպանության հարցում բացերը», – մասնավորապես ասված է ՄԱԿ-ի գլխավոր քարտուղարի մամուլի ծառայության կողմից հրապարակված հայտարարության մեջ: Անտոնիո Գուտերեշը հավելել է, որ Գլխավոր ասամբլեայի որոշումը կօգնի պետություններին արագացնել շրջակա միջավայրի պաշտպանության և մարդու իրավունքների ոլորտում իրենց պարտավորությունների կատարումը։ ՄԱԿ-ի ղեկավարն ընդգծել է, որ բանաձևի ընդունումը «միայն սկիզբն է» և կոչ է արել երկրներին մաքուր, առողջ և կայուն միջավայրի հասանելիության իրավունքը դարձնել «իրականություն բոլորի համար, ամենուր»:
ՄԱԿ-ի Մարդու իրավունքների գերագույն հանձնակատար Միշել Բաչելետը, ողջունելով ԳԱ-ի որոշումը, վերահաստատել է Գլխավոր քարտուղարի կոչը՝ հրատապ քայլեր ձեռնարկել բնապահպանական պարտավորությունների կատարման համար:
Տաթև Ֆռանգյան
