06.11.2024 | 19:28
ՀՀ գլխավոր դատախազը Հաագայում հանդիպել է Եվրաջասթի նախագահի հետ
Էրդողանը խոսել է Ռուսաստանի հետ առկա տարաձայնությունների մասին
Քաղաքականություն
26.07.2022 | 14:52
Թուրքիայի նախագահ Ռեջեփ Թայիփ Էրդողանը նախօրեին թուրքական լրատվամիջոցների հետ զրույցում խոսել է Անկարայի ու Մոսկվայի միջև առկա տարաձայնությունների մասին, գրում է Անադոլու գործակալությունը։
Էրդողանը հիշեցրել է, որ Աստանայի ձևաչափով Իրանի, Թուրքիայի ու ՌԴ ղեկավարների գագաթնաժողովի շրջանակում հանդիպել է Ռուսաստանի նախագահ Վլադիմիր Պուտինի հետ։
«Չնայած պատերազմի ստեղծած կոնյուկտուրային՝ մենք հեշտությամբ քննարկեցինք երկկողմ հարաբերությունների կարևոր հարցեր, և կարող եմ վստահորեն ասել, որ դրական հանդիպում էր։ Իհարկե, կան պատերազմի հետևանքով առաջացած որոշակի տարաձայնություններ։ Սակայն մենք չկիսեցինք համաշխարհային տեսակետը C-400-ի հետ կապված, ընդհակառակը, մենք արեցինք այն, ինչին հավատում էինք։ Մենք պետք է փոխադարձ շահերի հիման վրա պահպանենք մեր երկկողմ հարաբերությունները Ռուսաստանի հետ և զարգացնենք դրանք պոտենցիալ ուղղություններով։ Այդ պատճառով Աստանայի գագաթնաժողովի շրջանակներում մենք մանրամասն քննարկել ենք սիրիական հակամարտության տարբեր ասպեկտները պարոն Պուտինի ու պարոն Ռաիսիի հետ»,-ասել է Էրդողանը։
Նա նշել է, որ կարևոր է երկրների միջև համակարգման շարունակումը սիրիական խնդրի լուծման համար։ Ըստ Էրդողանի՝ Թեհրանում նախորդ շաբաթ կայացած բանակցությունների առաջնահերթ թեման եղել է ահաբեկչության դեմ պայքարը։
«Սիրիան դարձել է ահաբեկչական կազմակերպությունների բույն։ Ուստի՝ և՛ Ռուսաստանը, և՛ Իրանը պետք է Սիրիայի հարցում իրենց դիրքորոշումները հստակեցնեն»,-ասել է Թուրքիայի նախագահը։
Հիշեցնենք, որ Անկարան ցանկանում է Սիրիայում նոր ռազմական գործողություն իրականացնել։ Օրերս էլ Էրդողանը հայտարարել էր, որ ՌԴ-ի ու Իրանի աջակցությունն են ակնկալում այդ հարցում։
Էմմա Չոբանյան
