Մոսկվայում ձերբակալվել և ազատ է արձակվել «Առաջին ալիքի» նախկին աշխատակից Մարինա Օվսյաննիկովան

Ռուսական «Առաջին ալիքի» նախկին աշխատակից Մարինա Օվսյաննիկովային բերման են ենթարկել, այս մասին BBC-ին  հայտնել է  նրա փաստաբանը։ Օվսյաննիկովայի թելեգրամ ալիքը հրապարակել է լուսանկարներ, որտեղ երևում է, թե ինչպես են ոստիկանները նրան նստեցնում ոստիկանական մեքենան։ Ավելի ուշ Օվսյաննիկովան ազատ է արձակվել, հաղորդվում է, որ բերման ենթարկվելը կապված է ռուսական բանակը «վարկաբեկելու» վարչական գործի հետ։

Լրագրողի փաստաբան Դմիտրի Զախվատովի խոսքով՝ նրան ձերբակալել են Մոսկվայում՝ իր տան մոտ։ Ավելի ուշ Զախվատովը  BBC-ին հայտնել է, որ Օվսյաննիկովան գտնվում է Կրասնոսելսկի շրջանի ոստիկանության բաժանմունքում։ Օվսյաննիկովան թելեգրամ ալիքին տված հարցազրույցում ասել է, որ իրեն բերման են ենթարկել իր տան մոտերքում շների հետ զբոսնելիս։

Նրա խոսքով՝ մոտ երեք ժամ հետո իրեն տարել են Կրասնոսելսկի շրջանի ոստիկանական բաժանմունք և թույլ են տվել փաստաբան կանչել։ Դրանից հետո Օվսյաննիկովան ազատ է արձակվել։

Ըստ Avtozak Live-ի, նրա դեմ Ռուսաստանի Դաշնության Վարչական իրավախախտումների վերաբերյալ օրենսգրքի 20.3.3-ի առաջին մասով («Ռուսաստանի Դաշնության զինված ուժերի օգտագործման վարկաբեկում») արձանագրություն է կազմվել:

Օվսյաննիկովան բացատրել է, որ արձանագրությունը կապված է հուլիսի 13-ին Բասմանի դատարանի դիմաց իր հարցազրույցի հետ։ Լրագրողների այն հարցին, թե որ խոսքերի համար են պատրաստվում իրեն մեղադրանք առաջադրել, Օվսյաննիկովան պատասխանել է.

«Ես ասել եմ, որ Ուկրաինայում պատերազմը հանցագործություն է, դա իշխանությունը ձեռքում պահելու կատաղի փորձ է»,- պատմել է Օվսյաննիկովան։

Հիշեցնենք, որ Օվսյաննիկովան բողոքի ակցիա էր անցկացրել «Առաջին ալիքի»՝ ընդդեմ Ուկրաինայում պատերազմի ցուցանակը ձեռքին ուղիղ եթերի տաղավար ներխուժելով։

Տաթև Ֆռանգյան