Զելենսկին պատմել է՝ ինչո՞ւ Ուկրաինան չի կարող հարձակման անցնել

Ուկրաինայի նախագահ Վլադիմիր Զելենսկին հայտարարել է, որ ուկրաինական բանակը տեխնիկայի առումով զիջում է ռուսականին, այդ պատճառով չի կարող հարձակման անցնել։

«Մենք ավելի շատ կորուստներ կունենանք, իսկ մարդիկ ինձ համար առաջնահերթություն են»,- ասել է Զելենսկին Financial Times-ի հետ առցանց կոնֆերանսի ժամանակ, փոխանցում է BBC-ի ռուսական ծառայությունը։

Նա նաև հայտարարել է ՌԴ նախագահ Վլադիմիր Պուտինի հետ խաղաղ բանակցությունների պատրաստակամության մասին, բայց «դրանք պետք է դեմ առ դեմ անցկացվեն», քանի որ «չկա այլ մեկը», ում հետ կարելի է քննարկել պատերազմի ավարտը։

Միաժամանակ, ըստ Ուկրաինայի նախագահի, «հաղթանակի պետք է հասնել մարտի դաշտում»։ Նա ռուսական զորքերի հետմղումը նախապատերազմական դիրքեր անվանել է «Ուկրաինայի ժամանակավոր հաղթանակ», իսկ դրա վերջնական նպատակը՝ «ամբողջ տարածքի ամբողջական ինքնիշխանության» հաստատումը։

Ըստ Զելենսկիի՝ արևմտյան երկրները կարող են Պուտինին բանակցությունների մղել՝ զենք մատակարարելով Ուկրաինային և խստացնելով պատժամիջոցները, ներառյալ՝ նավթի և գազի ամբողջական էմբարգոն: Ուկրաինայի նախագահի խոսքով՝ Ուկրաինայի դաշնակիցները պետք է ապահովեն, որ Մոսկվան դադարեցնի ռազմական գործողությունները և հարգի հրադադարը։

Փոխարենը, որոշ արևմտյան կառավարություններ արդեն հոգնել են Ռուսաստանի դեմ պատժամիջոցների տնտեսական ազդեցությունից և ուղիներ են փնտրում դրանք մեղմելու՝ սեփական առևտրային շահերը պաշտպանելու համար, հավելել է Ուկրաինայի նախագահը։