Քաղաքականություն
20.05.2022 | 22:46
Թուրք քաղաքական գործիչ, ընդդիմադիր «Ժողովրդավարություն և առաջադիմություն» կուսակցության (DEVA) առաջնորդ Ալի Բաբաջանը հայտարարել է, որ պատրաստ է առաջադրվել նախագահի պաշտոնում, եթե վեց ընդդիմադիր կուսակցությունները չկարողանան համաձայնության գալ այլընտրանքային թեկնածուի շուրջ, գրում է «Ահվալ» գործակալությունը։
Բաբաջանը HaberTurk-ին տված հարցազրույցում ասել է, որ ընդդիմադիր 6 կուսակցությունները, այդ թվում՝ DEVA-ն, չեն քննարկել որևէ թեկնածուի անուն, այլ միայն այն որակավորումնեը, որոնք թեկնածուն պետք է ունենա։ Վեց ընդդիմադիր կուսակցությունները, որոնցից ամենամեծը Ժողովրդահանրապետական կուսակցությունն է, դաշինք են ստեղծել ընդհանուր սկզբունքների հիման վրա, որոնք ուղղված են Թուրքիայում նախագահական կառավարման համակարգի վերացմանը, ինչը նախագահ Ռեջեփ Թայիփ Էրդողանին տվել է հսկայական լիազորություններ։
Էրդողանի նախկին համախոհ, ներկայում ընդդիամիր Բաբաջանն ասել է, որ միասնական թեկնածուն կարող է լինել վեց կուսակցությունների նախագահներից մեկը, բայց կարող է լինել նաև մեկ այլ գործիչ։
«Սեղանին դեռ անուն չի հայտնվել։ Նույնիսկ առաջարկ է եղել դեռ անուններից չխոսել»,- ասել է Բաբաջանը՝ նշելով, որ որոշել են թեկնածուների անունները քննարկել ընտրությունների մոտենալուն զուգընթաց։
Նշենք, որ Ալի Բաբաջանը նախկինում եղել է Թուրքիայի էկոնոմիկայի, ինչպես նաև ԱԳ նախարարը։ Նա իշխող «Արդարություն և զարգացում» կուսակցության համահիմնադիրներից էր և նրա առաջնորդ ու երկրի նախագահ Ռեջեփ Թայիփ Էրդողանի մտերիմներից։ Սակայն Էրդողանի քաղաքականության հետ ունեցած տարաձայնությունների պատճառով նա 2019 թվականին դուրս եկավ իշխող ուժից և 2020-ին հիմնեց իր կուսակցությունը։
Էմմա Չոբանյան
